Qazaqstan men EO-nyń qarym-qatynasy óte joǵary deńgeıde - Terı Hakala

NUR-SULTAN. QazAqparat – Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi Eýropalyq Odaqtyń Ortalyq Azııa boıynsha arnaıy ókili Terı Hakalamen kezdesti, dep habarlaıdy QazAqparat tilshisi.

«Bul meniń arnaıy ókil retindegi alǵashqy resmı saparym. Osyǵan deıin dıplomat retinde Qazaqstanda bolǵan edim. Meniń osy jolǵy saparym eki kúnge jalǵasty. Keshe Qazaqstan Prezıdentimen kezdestim. Sonymen qatar, Senatta da kezdesýler ótti», - dedi Terı Hakala QR Syrtqy ister mınıstrimen ótken pikiralmasýdan keıin tilshilerdiń suraqtaryna jaýap bere otyryp.

Onyń aıtýynsha, aldaǵy ýaqytta Úkimet múshelerimen, tilshilermen, sondaı-aq EO dıplomatııalyq korpýsynyń ókilderimen kezdesý ótedi.

Terı Hakala Qazaqstan men EO-nyń qarym-qatynasy óte qarqyndy ekenin aıta kele, Keńeıtilgen áriptestik jáne yntymaqtastyq jónindegi kelisim bekitilgenin eske saldy.

«Qarym-qatynas salasynda koronavırýs birshama kedergi keltirip otyr. Alaıda tıisti qadamdardy iske asyryp kelemiz. Bizde óte jaqsy ózara dıalog ornaǵan, osy oraıda kóptegen taqyrypty emin-erkin talqylap otyrmyz. Jalpy, ashyq dıalog bar», - dedi ol.

Budan bólek ol Aýǵanstandaǵy jaǵdaıǵa qatysty pikir bildirdi.

«Qazirgi ýaqytta Aýǵanstannan qyzmetkerlerimizdi evakýatsııalaýmen aınalysyp jatyrmyz. Bul óz kezeginde uzaq protsess desek bolady. Ázirge, ondaǵy jaǵdaıǵa naqty baǵa berý erterek. EO ol jerde gýmanıtarlyq kómek jáne adam quqyqtary týraly halyqaralyq zańnama saqtalyp, osyǵan deıin Aýǵanstan halyqaralyq deńgeıde ózine alǵan mindettemeler oryndalady degen úmitte. Bul turǵyda ondaǵy jaǵdaı turaqty bolyp, saıası sheshim jasalǵany óte mańyzdy», - dedi Terı Hakala.

Buǵan deıin habarlanǵandaı, 19 tamyzda Memleket basshysy Qasym-Jomart Toqaev, QR Parlamenti Senaty tóraǵasynyń orynbasary Asqar Shákirov EO-nyń Ortalyq Azııa boıynsha arnaıy ókili Terı Hakalany qabyldaǵan bolatyn.