Qazaqstan men EO qatynastary belsendi damyp keledi - Muhtar Tileýberdi

ASTANA. QazAqparat - Búgin Aqordada QR Premer-Mınıstriniń orynbasary – Syrtqy ister mınıstri Muhtar Tileýberdi Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili – Eýropalyq Komıssııanyń Vıtse-prezıdenti Jozep Borreldiń Qazaqstanǵa saparmen kelýine qatysty pikir bildirdi, dep habarlaıdy QazAqparat tilshisi.

«Sapar mańyzdy oqıǵa – 20 qarashadaǵy Qazaqstan Respýblıkasy Prezıdentin saılaý qarsańynda ótip jatyr. Elimizde júrgizilip jatqan aýqymdy saıası jáne áleýmettik-ekonomıkalyq ózgeristerdi turaqty túrde qoldap, Ádiletti Qazaqstandy qurý jónindegi kúsh-jigerimizge qatysty eýropalyq seriktesterdiń oń pikirleri úshin Eýropalyq Odaqqa alǵys aıtamyz», - dedi M. Tileýberdi.

Osy oraıda mınıstr kelesi jyly Qazaqstan men Eýropalyq Odaq arasyndaǵy dıplomatııalyq qatynastardyń 30 jyldyǵy atap ótiletinin eske saldy.

«Biz senimge, ózara syılastyqqa jáne ortaq basymdyqtarǵa baǵyttalǵan berik qarym-qatynastarymyzdy joǵary baǵalaımyz. Sonymen qatar ózara is-qımyldyń 29 salasyn qamtıtyn Qazaqstan men Eýroodaq arasyndaǵy Keńeıtilgen áriptestik pen yntymaqtastyq týraly kelisimdi tıimdi iske asyrýǵa múddelimiz. Qarym-qatynastarymyz barlyq basym baǵyttar boıynsha belsendi damyp kele jatqanyn atap ótken jón», - dedi QR Syrtqy ister mınıstri.

Aıta keteıik, búgin Aqordada QR Syrtqy ister mınıstri M. Tileýberdi men Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili Jozep Borreldiń qatysýymen baspasóz máslıhaty ótti.

Eske salsaq, Eýropalyq Odaqtyń Syrtqy ister jáne qaýipsizdik saıasaty jónindegi Joǵarǵy ókili Jozep Borrel Qazaqstanǵa sapary qarsańynda QazAqparattyń menshikti tilshisine eksklıýzıv suhbat berdi.