Aqtaýda stýdentterdi joǵary baǵa alyp beremin aldaǵan alaıaq sottaldy
ASTANA. KAZINFORM - 2026 jylǵy 24 maýsymdaǵy Aqtaý qalalyq sotynyń úkimimen azamat D. alaıaqtyq (Qylmystyq kodeksiniń 190-baby) qylmysyn jasaǵany úshin kináli dep tanylyp, 3 jyl 9 aıǵa bas bostandyǵynan aıyryldy, dep habarlaıdy Mańǵystaý oblystyq prokýratýrasynyń baspasóz qyzmeti.
Sotta anyqtalǵandaı, sottalǵan adam Aqtaý qalasyndaǵy joǵary oqý oryndary stýdentteriniń senimine kirip, aqshalaı syıaqy úshin olardyń oqý úlgerimin jaqsartyp, emtıhandardan joǵary baǵa alýǵa kómektesýge ýáde bergen.
Osy syltaýmen ol stýdentterdiń 90 myńnan 1 mıllıon teńgege deıingi aqshalaı qarajatyn ıemdengen. Alaıda ýáde etken mindettemelerin oryndamaı, alynǵan qarajatty jeke basynyń qajetine jumsaǵan.
Jańa oqý jyly qarsańynda Aqtaý qalasynyń prokýratýrasy azamattardy oqý protsesine zańsyz aralasýǵa baılanysty aqyly «kómek» usynatyn, atap aıtqanda, baǵa qoıyp berýge, emtıhannan ótkizýdi nemese ózge de máselelerdi sheship berýdi ýáde etetin adamdarǵa senbeýge shaqyrady.
-Esińizde bolsyn: mundaı usynystar zańsyz bolyp tabylady jáne alaıaqtyq belgilerin qamtýy múmkin,-delingen habarlamada.
Osyǵan deıin 37 adamdy qajylyqqa aparmaq bolǵan alaıaqtar 4 jylǵa sottalǵany týraly jazdyq.
