Qazaqstan men EO arasyndaǵy jańa kelisimge baılanysty arnaıy memlekettik baǵdarlama qabyldanýy múmkin
ASTANA. QazAqparat - Qazaqstan men EO arasyndaǵy jańa kelisimge baılanysty arnaıy memlekettik baǵdarlama qabyldanýy múmkin. Bul týraly búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Bir jaǵynan Qazaqstan Respýblıkasy men ekinshi jaǵynan Eýropalyq Odaqtyń jáne oǵan múshe memleketteriniń arasyndaǵy keńeıtilgen áriptestik pen yntymaqtastyq týraly kelisimdi ratıfıkatsııalaý týraly» zań jobasy talqylaý barysynda málim boldy.
Talqylaý barysynda senator Ikram Adyrbekov Qazaqstanda buǵan deıin «Eýropaǵa jol» atty memlekettik baǵdarlama bolǵanyn alǵa tartyp, onyń nátıjelerin suraǵan bolatyn.
«Úsh jyldyq baǵdarlamanyń júzege asyrylýyn oń baǵalaımyz. «Eýropaǵa jol» atty baǵdarlama Qazaqstandy jańǵyrtý kezeńinde zańnamany jetildirý, standarttarǵa beıimdelý baǵytynda úlken ról atqardy. Al jańa kelisim kúshinen engennen keıingi máselege kelsek, aldaǵy ýaqytta biz jańa baǵdarlama qabyldaýdy oılap otyrmyz. Bul memlekettik nemese salalyq bolatynyn áli aıta almaımyz, degenmen, bundaı aýqymdy kelisimdi júzege asyrý úshin aýqymdy baǵdarlama men sharalar jospary kerek bolatyny anyq», - dedi QR Syrtqy ister mınıstriniń orynbasary Roman Vasılenko.
Onyń aıtýynsha, kelisim kúshine engennen soń ony júzege asyrý jospary qabyldanady. «Tutastaı alǵanda Eýropalyq Odaq bundaı kelisimdi TMD elderi arasynda alǵash ret Qazaqstanmen jasap otyr», - dedi R. Vasılenko.
