Qazaqstan men EO arasyndaǵy keńeıtilgen áriptestik pen yntymaqtastyq týraly kelisim qabyldandy - Senat
ASTANA. QazAqparat - Búgin QR Parlamenti Senatynyń jalpy otyrysynda «Bir jaǵynan Qazaqstan Respýblıkasy men ekinshi jaǵynan Eýropalyq Odaqtyń jáne oǵan múshe memleketteriniń arasyndaǵy keńeıtilgen áriptestik pen yntymaqtastyq týraly kelisimdi ratıfıkatsııalaý týraly» QR Zańy qabyldandy. Endi qujat Memleket basshysynyń qol qoıýyna joldanady.
Eske sala keteıik, kelisim Qazaqstan Prezıdenti Nursultan Nazarbaevtyń 2008 jylǵy QR Syrtqy ister mınıstrliginiń keńeıtilgen alqa otyrysynda bergen tapsyrmasyna sáıkes ázirlengen. Qujatqa 2015 jylǵy 21 jeltoqsanda Astanada qol qoıylǵan bolatyn.
Kelisim Qazaqstan men Eýropalyq Odaqtyń jáne oǵan múshe memleketterdiń arasyndaǵy ózara is-qımyldyń bazalyq qaǵıdattaryn qamtıtyn negiz salýshy qujat bolyp tabylady. Jańa kelisim Qazaqstan men EO arasyndaǵy 1995 jyly qol qoıylyp, 1999 jyly kúshine engen qoldanystaǵy kelisimdi almastyrady. Qujat 9 bólimnen 287 baptan, saýda bóligindegi jeti qosymshadan turady ári yntymaqtastyqtyń barlyq baǵytyn qamtıdy.
«Qazirgi Eýropalyq Odaq Qazaqstannyń asa mańyzdy ári iri saýda ekonomıkalyq áriptesi jáne ınvestory. Taýar aınalymynyń elý paıyzy men tartylǵan sheteldik ınvestıtsııalardyń elý paıyzdan astamy EO úlesine tıesili. Al Qazaqstannyń EO jalpy taýar aınalymynyń kólemi 26-oryndy ıelene otyryp, EO-nyń basty saýda áriptesteriniń ishinde otyz iri memelketter qataryna enedi. Kelisim keshendi sıpattaǵy qujat bolyp tabylady. Kelisim saıası dıalogty nyǵaıtýdy arttyrady, qaǵıdatty túrde jańa baǵyttar retinde ǵaryshtyq qaýipsizdik, jappaı qyryp-joıý qarýlaryn taratýǵa qarsy kúres, terrorızmdi qarjylandyrýǵa qarsy is-qımyl, atys jáne jeńil qaraýlardyń taralymy, kıberqylmysqa qarsy sharalar, derbes málimetterdi qorǵaý, memlekettik qyzmet salasy, klımattyń ózgerýi, quqyq qorǵaý salalaryn atap ótýge bolady. Qujatta bostandyq, qaýipsizdik, ádilet jáne qaýipsizdikti qamtamasyz etý baǵytyndaǵy yntymaqtastyqqa da barynsha mán berilip otyr. EO ınnovatsııalar, ǵylym jáne tehnologııa, bilim jáne mádenıet ózara is qımyl odan ári damytylady», - dedi Syrtqy ister mınıstri Erlan Ydyrysov.
Al senator Nurtaı Ábiqaevtyń aıtýynsha, Qazaqstan men EO arasyndaǵy keńeıtilgen áriptestik pen yntymaqtastyq týraly kelisimniń saıası-ekonomıkalyq mańyzy zor.
«Qazaqstan TMD elderi arasynda Eýropalyq Odaq bundaı kelisimdi jasap otyrǵan birden bir el. Aıta keterligi, kelisim bizdiń elimizge saıası assotsıatsııa men ekonomıkalyq ıntegratsııa, tereń saıası jáne ekonomıkalyq reformalar júrgizý boıynsha eshqandaı mindetteme júktemeıdi. Eýropamen uzaqmerzimdi yntymaqtastyq Qazaqstannyń syrtqy saıasat tujyrymdamasyna tolyq sáıkesedi. Bul kelisim Qazaqstan men Eýropalyq Odaq qarym-qatynasynyń jańa paraǵyn ashatyn bolady», - dedi N. Ábiqaev.
