Qazaqstan men EO arasynda aýyl sharýashylyǵy ónimderiniń aınalymy 7%-ǵa ósti
ASTANA. KAZINFORM — Aýyl sharýashylyǵy mınıstri Aıdarbek Saparov Qazaqstan Respýblıkasyndaǵy Eýropalyq odaqtyń Tótenshe jáne Ókiletti Elshisi Aleshka Sımkıchpen kezdesý ótkizdi. Bul týraly vedomstvonyń baspasóz qyzmeti málim etti.
Konstrýktıvti dıalog barysynda taraptar saýda-ekonomıkalyq yntymaqtastyqtyń basym baǵyttaryn, veterınarııalyq-sanıtarııalyq ózara is-qımyl máselelerin, sondaı-aq agroónerkásiptik keshendegi ınvestıtsııalyq áriptestikti damytý perspektıvalaryn talqylady.
Mınıstr Eýropalyq odaqqa agrarlyq saladaǵy Qazaqstanmen yntymaqtastyqty nyǵaıtýǵa degen turaqty qyzyǵýshylyǵy úshin alǵysyn bildirdi.
– EO – elimizdiń AÓK salasyndaǵy negizgi saýda-ekonomıkalyq jáne ınvestıtsııalyq seriktesteriniń biri. 2024 jyly Qazaqstan men EO elderi arasyndaǵy aýyl sharýashylyǵy ónimderi boıynsha syrtqy saýda aınalymy 1,3 mlrd AQSh dollaryn qurap, 7 paıyzdyq ósimdi kórsetti. 2025 jyldyń 5 aıynda bul kórsetkish 11 paıyzǵa ósip, 662,2 mln dollardy qurady. Biz ekologııalyq taza ónimdi, ásirese astyq pen undy eksporttaýdyń aıtarlyqtaı áleýetine ıemiz jáne Eýropa naryǵyna astyqty turaqty jetkizýge daıynbyz. Osyǵan baılanysty Estonııa jáne Latvııa elderimen Baltyq porttaryn tranzıttik torap retinde paıdalaný máselesi boıynsha kelissózder júrgizilýde, – dedi Aıdarbek Saparov.
Kezdesýde mal sharýashylyǵy ónimderin eksporttaý máselesine de erekshe nazar aýdaryldy. Búginde elimizdiń 20 kásiporyn EO elderine balyq ónimderin eksporttaýǵa quqyq alǵan. Ara sharýashylyǵy kásiporyndary bal eksporttaý máselesin pysyqtap jatyr. Sonymen qatar, akvaósirý jáne jylqy eti ónimderin jetkizý úshin EO naryǵyn ashý baǵytynda jumystar jalǵasýda, ulttyq baqylaý josparlaryn ázirleý jáne veterınarııalyq-sanıtarııalyq talaptardy kelisý protsesteri júrgizilip jatyr.
Mınıstr eýropalyq bıznes tarapynan Qazaqstanǵa degen qyzyǵýshylyqtyń joǵary ekenin atap ótti. Qazirgi ýaqytta jalpy quny 270 mln AQSh dollarynan asatyn úsh iri ınvestıtsııalyq joba iske asyrylyp jatyr. Atap aıtqanda, Almaty oblysynda premıks shyǵaratyn zaýyt pen Qostanaı oblysynda UBM Group kompanııasynyń qurama jem zaýytynyń qurylysy, sondaı-aq Almaty oblysynda Carlsberg Group kompanııasynyń alkogolsiz sýsyndar óndiretin zaýyty men ALFASEED KFT kompanııasymen birlesken súrlem óndirisin jergiliktendirý jobasy qolǵa alynǵan.
CLAAS, Amazone-Werke, SDF Group, Pöttinger sııaqty eýropalyq kompanııalardyń kásiporyndary tabysty jumys isteýde. 2025 jyldyń basynan bastap John Deere tehnıkasyn jergiliktendirý jobasy júzege asyrylyp jatyr.
– Biz eýropalyq kompanııalardyń qatysýyn keńeıtý jáne EO-pen tereń yntymaqtastyq ornatý jónindegi usynystarǵa ashyqpyz, – dep atap ótti Aıdarbek Saparov.
Óz kezeginde, Eýropalyq odaqtyń Elshisi ashyq ári jan-jaqty dıalog úshin alǵysyn bildirip, agroónerkásiptik saladaǵy yntymaqtastyqtyń joǵary áleýetin atap ótti jáne EO tarapynan talqylanǵan baǵyttar boıynsha Qazaqstanmen ózara is-qımyldy odan ári damytýǵa daıyn ekenin jetkizdi.
Aıta keteıik, Qazaqstannyń aýyl sharýashylyǵy óniminiń Qytaıǵa eksporty 35% artty.