Qazaqstan men EKPA yntymaqtastyǵy: Máýlen Áshimbaev birpalataly Parlament bastamasyn tanystyrdy
PARIJ. KAZINFORM – Frantsııaǵa sapary aıasynda Máýlen Áshimbaev EKPA Tóraǵasy Teodoros Rýsopýlospen, Eýropa Keńesiniń Bas hatshysy Alen Bersemen jáne Qazaqstan boıynsha baıandamashy Jolt Nemetpen kezdesti. Bul týraly QR Parlament Senatynyń baspasóz qyzmeti málim etti.
— Taraptar saıası reformalardy, áleýmettik ıntegratsııany damytý, Konstıtýtsııalyq Sottyń rólin kúsheıtý jáne bir palataly Parlament qurý bastamasyn talqylady. Sondaı-aq Máýlen Áshimbaev EKPA-nyń Saıası máseleler jáne demokratııa jónindegi komıtetiniń Tóraǵasy Bertran Býıkspen júzdesti, — delingen habarlamada.
Aıta keteıik, Senat tóraǵasy men Eýropa Keńesi Parlamenttik Assambleıasynyń Prezıdenti birlesken málimdeme jasady.
— Búgin Eýropa Keńesiniń Parlamenttik Assambleıasy Qazaqstandaǵy demokratııalyq reformalardy qoldaýdy rastaıtyn qarar qabyldaǵan kezde, biz 2004 jyly qol qoıylǵan mekemelerimiz arasyndaǵy Yntymaqtastyq týraly kelisimde kózdelgendeı, parlamentaralyq yntymaqtastyqty nyǵaıtýǵa, ınstıtýtsıonaldyq jáne saıası dıalogty tereńdetýge jáne ortaq qundylyqtar negizinde progresti ilgeriletýge óz mindettemelerimizdi qaıta jarııalaımyz, — delingen málimdemede.