Qazaqstan men EQQDB 590 mln dollarlyq JEK jobalaryn talqylady

ASTANA. KAZINFORM — Qazaqstan Respýblıkasy Energetıka mınıstrliginde Energetıka vıtse-mınıstri Suńǵat Esimhanov pen Eýropa qaıta qurý jáne damý bankiniń (EQQDB) ókilderi arasynda kezdesý ótti. Bul týraly vedomstvonyń baspasóz qyzmeti málim etti.

Kezdesý barysynda ekonomıkany dekarbonızatsııalaý, jańartylatyn energetıkany damytý jáne elektr ınfraqurylymyn jańǵyrtý baǵyttaryndaǵy yntymaqtastyqtyń negizgi máseleleri talqylandy.  

Kirispe sózinde vıtse-mınıstr EQQDB-ǵa energetıka sektorynyń turaqty damýyna qosqan kópjyldyq qoldaýy men úlesi úshin alǵys bildirdi. Qazaqstan halyqaralyq mindettemelerine sáıkes 2060 jylǵa deıin kómirtegi beıtaraptyǵyna qol jetkizýdi josparlap otyr jáne tómen kómirtekti ekonomıka saıasatyn belsendi túrde iske asyryp keledi.

— Taraptar jańartylatyn energııa kózderiniń (JEK) úlesin 2030 jylǵa deıin 15%-ǵa, al 2050 jylǵa qaraı 50%-ǵa deıin (qazirgi 6%-dan) arttyrý jónindegi mınıstrliktiń josparlaryn egjeı-tegjeıli talqylady. Aýktsıondardy jyl saıyn ótkizý jáne strategııalyq ınvestorlardy tartý máselelerine erekshe nazar aýdaryldy. Sonymen qatar, Energetıka mınıstrligi men EQQDB arasynda qol qoıylǵan ózara túsinistik týraly Memorandýmnyń mańyzdylyǵy atap ótildi. Bul qujat aıasynda jalpy qýaty 788 MVt bolatyn JEK jobalaryna shamamen 590 mln AQSh dollary kóleminde qarjylandyrý tartylǵan, — delingen habarlamada.

Talqylaýdyń jeke blogy retinde BUU Bas Assambleıasynyń 78-sessııasynda Qazaqstan Prezıdenti Qasym-Jomart Toqaev jarııalaǵan Ádiletti energetıkalyq kóshý platformasyn (JETP) qurý bastamasy sóz boldy. Bul bastama klımattyq qarjylandyrýdy tartýǵa jáne tómen kómirtekti ekonomıkaǵa ınklıýzıvti kóshýdi damytýǵa baǵyttalǵan.

Batys Qazaqstannyń energııa júıesin eldiń Birtutas elektr energetıkalyq júıesimen (BEJ) biriktirý jobasy da erekshe atap ótildi. KEGOC kompanııasymen birlesip júzege asyrylatyn bul joba energetıkalyq senimdilikti arttyrýǵa, JEK-ti ıntegratsııalaýǵa jáne batys óńirlerde gaz qýatyn keńinen paıdalanýǵa múmkindik beredi.

Sonymen qatar, EQQDB-men birlesip iske asyrylyp jatqan Astana qalasynyń syrtqy elektrmen jabdyqtaýyn kúsheıtýge baǵyttalǵan joba talqylandy. Bul joba aıasynda 500 kV kerneýli jańa áýe jelisi men ekinshi qorektendirý ortalyǵy salynbaq. Jobany 2028 jylǵa qaraı iske asyrý josparlanyp otyr.

Yntymaqtastyqty keńeıtý sheńberinde Qazaqstannyń Bakýde ótetin BUU klımattyq konferentsııasyna (SOR-29) qatysýy, sondaı-aq «jasyl» energetıka men transshekaralyq ózara is-qımyldy damytý boıynsha kelisimderge qol qoıýy da atap ótildi.

Energetıka mınıstrligi EQQDB-men seriktestikti odan ári nyǵaıtýǵa, onyń ishinde naqty usynystardy talqylaýǵa jáne ádiletti energetıkalyq kóshý men turaqty damý salasyndaǵy basym jobalardy birlesip iske asyrýǵa daıyn ekenin bildirdi.

Eske sala keteıik, buǵan deıin Energetıka mınıstri Erlan Aqkenjenov Qytaı Qazaqstandaǵy jańartylatyn energetıka jobalaryna qyzyǵýshylyq tanytyp otyrǵanyn málimdegen edi.