Qazaqstan men EYU saýdasy $15 mlrd-tan asty: yntymaqtastyq jańa deńgeıge shyqty
ASTANA. KAZINFORM — Qazaqstan Respýblıkasy Premer-mınıstriniń orynbasary – ulttyq ekonomıka mınıstri Serik Jumanǵarın Ekonomıkalyq yntymaqtastyq uıymynyń (EYU) bas hatshysy Asad Madjıd Hanmen resmı kezdesý ótkizdi. Taraptar saýda baılanysyn arttyrý, jańa kólik dálizderin damytý jáne aımaq ekonomıkasyndaǵy tsıfrlyq transformatsııa jaıyn talqylady. Bul týraly Úkimet málim etti.
Kezdesý barysynda EYU-ǵa múshe memleketter Qazaqstannyń mańyzdy saýda áriptesteri ekeni atap ótildi. 2025 jyldyń qorytyndysy boıynsha EYU memleketterimen ózara saýda kólemi ótken jylmen salystyrǵanda 11,5%-ǵa artyp, $15 mlrd-tan asty. Qazaqstandyq eksport — negizinen munaı, mys, bıdaı, kúnbaǵys maıy, un men munaı ónimi.
Serik Jumanǵarın Qazaqstannyń EYU elderimen ózara is-qımyly sońǵy jyldary turaqty oń dınamıkany kórsetip otyrǵanyn, ony arttyrýda aıtarlyqtaı áleýetke ıe ekenin atap ótti. Qazaqstanda $1 mlrd-qa jýyq soma bolatyn eksporttyq áleýeti joǵary 137-ge jýyq óńdeýshi ónerkásip taýarlarynyń pozıtsııasy bar.
— Álemdik ekonomıkanyń negizgi draıveriniń biri retinde qarastyrylatyn elektrondyq saýdany damytýǵa erekshe kóńil bólinýde. EYU elderiniń kúsh-jigerin shoǵyrlandyrý turaqty jáne ózara tıimdi saýda keńistigin qalyptastyrýǵa múmkindik beretini atap ótildi, — delingen habarlamada.
Taraptar EYU keńistigindegi ekonomıkalyq baılanystyń negizi — kólik-logıstıkalyq yntymaqtastyq máselesin egjeı-tegjeıli talqylady. 2026 jyly Qazaqstan EYU-nyń kólik sektoryna tóraǵalyq etedi. Vıtse-premer «Soltústik — Ońtústik» dálizi Aýǵanstan jáne Pákistanǵa jol ashatynymen basym mańyzǵa ıe ekenin aıqyndap berdi.
Sondaı-aq, ol bıyl Qazaqstan men Pákistan arasynda Qytaı arqyly (Qaraqorym tas joly arqyly) alǵashqy júkter jetkizile bastaǵanyn habarlady.
Atalǵan baǵdarlardyń damýy, kóbisiniń teńizge shyǵýǵa múmkindigi joq bolǵandyqtan Ortalyq Azııa elderi úshin strategııalyq mańyzǵa ıe. Olar arqyly halyqaralyq teńiz porttaryna qol jetkizýge bolady.
Kezdesý barysynda EYU bas hatshysy Asad Madjıd Han Qazaqstan Úkimetin Óńirlik ekologııalyq sammıttiń sátti ótýimen quttyqtap, elimizdiń uıymdaǵy jetekshi rólin atap ótti.
— Qazaqstan — EYU-nyń aıryqsha áriptesi. Biz Qazaqstandy óńirlik hab jáne EYU elderi men Eýropa arasyndaǵy kópir retinde qarastyramyz, — dedi ol.
Onyń aıtýynsha, qazirgi geosaıası jaǵdaıda aımaqtar men qurlyqtaǵy baılanystyń mańyzy arta túsedi. Osyǵan baılanysty EYU qazirgi jáne perspektıvalyq marshrýttardyń kartasyn daıyndaý, sondaı-aq, Kaspıı teńiziniń akvatorııasyndaǵy ınfraqurylymdyq jobalardy júzege asyrý sekildi kólik dálizderin damytý jumystaryn júrgizýde.
Taraptar sondaı-aq Eýrazııalyq ekonomıkalyq odaq pen EYU arasyndaǵy ıntegratsııalyq protsesterdi ushtastyrý máselesin, sonyń ishinde Pákistanmen erkin saýda aımaǵy týraly kelisim jasaýdyń keleshegin talqylady.
Qorytyndylaı kele, Serik Jumanǵarın EYU elderiniń ózara úılesken is-qımylynyń mańyzdylyǵyn atap ótti. Ol Qazaqstannyń uzaqmerzimdik jáne ózara tıimdi áriptestik úshin jaǵdaı jasaı otyryp, iri ekonomıkalyq odaqtar arasyndaǵy baılanystyrýshy býyn bolýǵa daıyn ekenin málimdedi.
Aıta keteıik, buǵan deıin QR Premer-mınıstriniń orynbasary – ulttyq ekonomıka mınıstri Serik Jumanǵarın Óńirlik ekologııalyq sammıt alańynda BUU Bas hatshysynyń kómekshisi, BUU Damý Baǵdarlamasy (BUUDB) ákimshisiniń orynbasary Haolıan Shýmen kezdesken bolatyn.
