Qazaqstan men Dúnıejúzilik bank arasynda 1,3 mlrd dollardy quraıtyn úsh joba qabyldanbaq
Bul týraly búgin Parlament Májilisiniń jalpy otyrysynda QR Ulttyq ekonomıka vıtse-mınıstri Marat Qusaıynov málim etti. Eske salaıyq, jalpy otyrysta «Qazaqstan Respýblıkasynyń Úkimeti men Halyqaralyq Qaıta Qurý jáne Damý Banki arasyndaǵy Qazaqstan Respýblıkasynda ofıster qurý jáne olardyń jumys isteýi týraly kelisimdi ratıfıkatsııalaý týraly» zań jobasy talqylanǵan bolatyn.
«2014 jyldyń mamyr aıynda Memleket basshysynyń bastamasymen Qazaqstan men Dúnıejúzilik bank arasyndaǵy 2016-2021 jyldary jalpy quny 4,9 mlrd. AQSh dollaryn quraıtyn Seriktestik týraly negizdemelik kelisimge qol qoıyldy. Onyń ishinde 4,3 mlrd dollary Dúnıejúzilik banktiń esebinen bólinip, birlesken jobalardy iske asyrýǵa baǵyttalady», dedi Marat Qusaıynov.
Vıtse-mınıstrdiń aıtýynsha, 2015 jyly jalpy quny 293 mln dollardy quraıtyn 3 jobany Parlament ratıfıkatsııalaǵan bolatyn. Atap aıtqanda, olar: Shaǵyn jáne orta bıznestiń básekelestigin arttyrý; Ónimdi ınnovatsııalardy yntalandyrý; Eńbek daǵdylaryn jáne jumys oryndaryn damytý jobalary bolyp tabylady.
«Budan bólek, 2015 jyly Dúnıejúzilik bank 1 mlrd dollar quraıtyn bıýdjet tapshylyǵyn óteýge arnalǵan qaryzdyń birinshi transhy maquldandy. Al taǵy 1 mlrd dollardy quraıtyn qaryzdyń ekinshi transhy 2016 jyldyń shildesine qaraı qabyldanatyny josparlanady. Sonymen birge, aǵymdaǵy jyly 1,3 mlrd dollardy quraıtyn úsh jobany ratıfıkatsııalaý kózdelip otyr. Olar: «Ortalyq-Batys» dáliziniń Astana-Beıneý ýchaskesin qaıta qurý; Áleýmettik medıtsınalyq saqtandyrý; Bilim júıesin jańǵyrtý. Aıta keterligi, Dúnıejúzilik bankpen tyǵyz yntymaqtastyqqa baılanysty Qazaqstan Eýropa jáne Ortalyq Azııadaǵy Dúnıejúzilik Bank ınvestıtsııalaryn aýmaq boıynsha eń iri kólemin tartqan el bolyp tabylady», dedi M. Qusaıynov.
