Qazaqstan men DKU keden salasyndaǵy yntymaqtastyqty kúsheıtedi
ASTANA. KAZINFORM — Oljas Bektenov pen Dúnıejúzilik keden uıymynyń Bas hatshysy Ien Sonders yntymaqtastyqtyń ózekti máselelerin talqylady, dep habarlaıdy Úkimettiń baspasóz qyzmeti.
QR Premer-mınıstri Oljas Bektenov pen Dúnıejúzilik keden uıymynyń (DKU) Bas hatshysy Ien Sonders Qazaqstan Respýblıkasy Prezıdenti Qasym-Jomart Toqaev pen DKU basshysy arasyndaǵy kelissózder barysynda qol jetkizilgen ýaǵdalastyqtardy eskere otyryp, odan ári yntymaqtastyq máselelerin talqyǵa saldy.
Taraptar kedendik ákimshilendirý, tsıfrlandyrý jáne kólik-logıstıkalyq dálizderdi damytý salalaryndaǵy ózara is-qımyldy odan ári tereńdetý perspektıvalary jóninde pikir almasty.
Oljas Bektenov transkontınenttik saýdanyń turaqtylyǵyn qamtamasyz etý el ekonomıkasyn damytýdyń negizgi faktorlarynyń biri ekenin atap ótti.
DKU-nyń 2025–2028 jyldarǵa arnalǵan «Ózara baılanysqan álem úshin derekterge negizdelgen keden» strategııalyq josparynyń basymdyqtary Qazaqstanda júrgizilip jatqan reformalardyń mindetterine sáıkes keledi. Osyǵan baılanysty Qazaqstannyń tranzıttik múmkindikteri men DKU qyzmetin úılestirý óńirde artyq kedergilersiz jáne senimdi baqylaýdy qamtamasyz etetin kedendik ózara is-qımyldyń zamanaýı modelin qalyptastyrýǵa múmkindik beredi.
DKU Bas hatshysy ekijaqty yntymaqtastyqty odan ári damytýdyń jáne keden isi tájirıbesi deńgeıin arttyrýdyń mańyzdylyǵyn atap ótti. Ien Sonders Qazaqstannyń kedendik ákimshilendirý salasynda úzdik standarttar engizýge belsendi qatysyp otyrǵanyn, sondaı-aq Transkaspıı halyqaralyq kólik baǵytyn (THKB) damytýdaǵy Qazaqstannyń baılanystyrýshy býyn retindegi rólin atap ótti.
Bıylǵy jeti aıda THKB arqyly shamamen 350 myń tonna taýar tasymaldandy. Júk aǵynynyń qarqyndylyǵy shamamen 24 myń kólik quralyn qurady. Osy kezeńde tranzıttik taýarlardyń jalpy kólemi 14,6 mln tonnaǵa jetti.
— Qazaqstan Prezıdenti jarııalaǵan Tsıfrlandyrý jáne jasandy ıntellekt jyly aıasynda kedendik ákimshilendirýge zamanaýı sheshimder engizilip jatyr. Biryńǵaı KEDEN júıesi deklaratsııalaý, tranzıt, baqylaý jáne tıisti memlekettik organdarmen ózara is-qımyl úderisterin biriktiredi. Smart Cargo platformasy kólik jáne memlekettik qyzmetterdi, elektrondy ruqsattar men júkterdi qadaǵalaý quraldaryn biriktiredi. Aqparattyq júıelerdiń ıntegratsııalanýy bıznes usynatyn derekterdiń qaıtalanýyn boldyrmaı, olardy jetkizý tizbeginiń barlyq kezeńinde memlekettik organdar tarapynan birtutas paıdalanylýyn qamtamasyz etedi, — delingen habarlamada.
Kezdesý sońynda taraptar keden salasyndaǵy yntymaqtastyqty odan ári damytýǵa múddeli ekenderin jetkizdi.
Osydan buryn Prezıdent Qasym-Jomart Toqaev Aqordada Dúnıejúzilik keden uıymynyń Bas hatshysy Ien Sonderspen kezdesý ótkizgenin jazǵanbyz.
