Qazaqstan-Chevron strategııalyq áriptestiginiń keleshegi talqylandy
ASTANA. KAZINFORM — QR Energetıka mınıstri Erlan Aqkenjenov «Chevron» korporatsııasynyń dırektorlar keńesiniń tóraǵasy jáne bas atqarýshy dırektory Maıkl Ýırtpen kezdesti, dep habarlaıdy mınıstrliktiń baspasóz qyzmeti.
Mınıstr «Chevron-men» uzaq merzimdi yntymaqtastyqtyń mańyzdylyǵyn jáne kompanııanyń Qazaqstannyń munaı-gaz sektory men ekonomıkasynyń damýyna qosqan eleýli úlesin atap ótti. Qazaqstan Úkimeti ınvestorlar úshin turaqty ári senimdi jaǵdaılar jasap keledi.
Negizgi jetistikterdiń biri — «Teńiz» ken ornyndaǵy «Bolashaq» keńeıtý jobasynyń (BKJ) tabysty aıaqtalýy. Bul elimizdiń energetıkalyq áleýetin arttyrýǵa jańa múmkindikter ashady. Kezdesýde jobalyq kórsetkishterge qol jetkizý, óndiristik úderisterdi ońtaılandyrý, sondaı-aq ózara tıimdi múddelerdi eskere otyryp, Teńizdegi yntymaqtastyqtyń aldaǵy kezeńderi talqylandy. Qazaqstan tarapynan ónerkásiptik qaýipsizdik standarttaryn saqtaý, jabdyqtarǵa ýaqytyly tehnıkalyq qyzmet kórsetý jáne jańǵyrtý qajettiligine erekshe nazar aýdaryldy. Sondaı-aq jobalardaǵy qazaqstandyq úlesti arttyrý men ulttyq kadrlardy damytý máseleleri kóterildi.
Munaı-gaz hımııasy salasynyń keleshegine de basa nazar aýdaryldy. Polıpropılen óndiretin keshendi qajetti shıkizatpen qamtamasyz etý jáne polıetılen óndirisiniń negizi bolatyn gazdy bóletin keshenniń qurylysy talqylandy. Qazaqstandyq tarap jergilikti bıznesti damytý maqsatynda ónerkásiptik klaster qurýdyń mańyzdylyǵyn atap ótti.
— Biz «Chevron-men» áriptestikti joǵary baǵalaımyz. Bul seriktestik «Teńizdegi» BKJ sııaqty mańyzdy jobalardy iske asyrýǵa múmkindik berip otyr. Aldaǵy yntymaqtastyq Qazaqstannyń strategııalyq múddelerine saı kelýi kerek. Olardyń qataryna «Teńizdi» damytý, qaýipsizdik standarttaryn saqtaý, ulttyq kadrlardy qoldaý jáne munaı-gaz hımııasyn ilgeriletý jatady. Biz ortaq maqsattarǵa jetý jolynda ashyq dıalogqa daıynbyz, — dedi QR Energetıka mınıstri Erlan Aqkenjenov.
Buǵan deıin Memleket basshysy Chevron korporatsııasy dırektorlar keńesiniń tóraǵasy Maıkl Ýırtti qabyldaǵanyn jazǵan edik.