Qazaqstan men Chehııanyń syrtqy ister mınıstrleri saýda-ónerkásiptik salada yntymaqtastyqty damytýǵa kelisti
ASTANA. QazAqparat - Qazaqstan Respýblıkasynyń syrtqy ister mınıstri Erlan Ydyrysov Qazaqstanǵa resmı saparmen kelgen Chehııa Respýblıkasynyń syrtqy ister mınıstri Lıýbomır Zaoralekpen kelissózder júrgizdi, dep habarlaıdy primeminister.kz.
Syrtqy saıasat vedomstvolarynyń basshylary mashına qurastyrý, energetıka, «jasyl ekonomıka», aýyl sharýashylyǵy, áskerı-ónerkásiptik keshen, bilim berý, densaýlyq saqtaý jáne týrızm salalaryndaǵy ekijaqty yntymaqtastyqtyń, sonymen qatar Qazaqstan - Eýropa odaǵy jáne Eýrazııalyq ekonomıkalyq odaq - Eýropa odaǵy júılereniń ózara is-qımyl jasasýdyń ózekti máseleleri men keleshegin qarastyrdy.
Kelissózder barysynda E. Ydyrysov Chehııany saýda-ónerkásiptik jáne ınvestıtsııalyq salalarda aıtarlyqtaı áleýeti bar, Qazaqstannyń senimdi seriktesi jáne Eýropa odaǵynyń mańyzdy múshesi ekenin atap ótti. Ol Qazaqstandaǵy ınvestıtsııalyq ahýaldyń artyqshylyqtary týraly aıtyp, osy kúnderi Astana men Almatyda ótip jatqan Qazaqstan-Chehııa bıznes-forýmdaryndaǵy Chehııanyń 30-dan astam iskerı orta ókilderiniń qatysýyn quptaıtynyn aıtty.
«Bizdiń ortaq jumysymyzdyń basty nazarynda eki eldiń iskerı ortalary arasyndaǵy tikeleı dıalog pen seriktestikke belsendi túrde atsalysý bolýy kerek», - dedi E. Ydyrysov.
E. Ydyrysov, sondaı-aq, Chehııanyń qazaqstandyq týrıster men stýdentterdiń kóp baratyn baǵyttarynyń biri ekenin atap ótti. Qazirgi tańda 2 myńnan astam adam Chehııanyń joǵarǵy oqý oryndarynda bilim alýda, jáne shamamen 100 myń qazaqstandyq týrıst jyl saıyn Chehııaǵa baryp qaıtady.
