Qazaqstan men Chehııa ortaq avtokólik óndirisin qalaı damytyp jatyr
ASTANA. KAZINFORM — Byltyr elimizde Škoda Auto kompanııasymen birlesip, 2800 avtokólik shyǵarylǵan. Bul jóninde QR Ónerkásip jáne qurylys vıtse-mınıstri Oljas Saparbekov Qazaqstan — Chehııa bıznes forýmynda málimdedi.
Onyń sózinshe, qos memleket birlesip, Qazaqstanda iri ındýstrııalyq jobalardy júzege asyryp jatyr.
— Jarqyn mysal retinde Škoda Auto kompanııasymen áriptestikti ataýǵa bolady. Qazaqstan 2024 jyly atalǵan kásiporynmen seriktestikte avtokólik shyǵarýdy bastady. 2025 jyldyń qorytyndysy boıynsha, 2800-den astam tehnıka óndirildi, — dedi vıtse-mınıstr.
Onyń aıtýynsha, endigi maqsat — avtokólik bólshekterin elimizde jasaýǵa kóshý jáne mashına jasaýǵa qajetti ónimderdi óndirýdiń tolyqqandy tizbegin qalyptastyrý.
— Mundaı jobalardy biz daıyn bólshekterden ónim qurastyratyn alań emes, tehnologııa men óndiristi damytýdyń quraly retinde qarastyramyz. Viessmann kompanııasymen birlesip, jylý energetıkasy qurylǵylaryn óndiremiz. Joba quny — 9 mln dollar, — dedi Oljas Saparbekov.
Avıatsııa sektory da nazarda. Omnipol kompanııasy arqyly elimizge L 410 ushaqtary jetkizilip jatyr.
— Atalǵan tehnıkany áli de alý josparda bar. Sondyqtan Qazaqstandaǵy kásiporyndardyń birinde bul ushaqqa servıstik qyzmet kórsetý jáne jóndeý boıynsha ortalyq ashý qajet, — dedi vıtse-mınıstr.
Onyń málimdeýinshe, osylaısha, Qazaqstan men Chehııa qarym-qatynasy damyp, saýdadan birtindep ortaq óndiriske ulasyp keledi. Odan ári bólshekterdi ózimizde óndirip, jańa ındýstrııalyq baǵyttar ashý josparda bar.
Aıta keteıik, buǵan deıin Qazaqstan men Chehııa arasyndaǵy taýar aınalymy 700 mln dollardan asqanyn jazǵanbyz.
