Qazaqstan men Chehııa arasyndaǵy taýar aınalymy 700 mln dollardan asty
ASTANA. KAZINFORM – Búginde respýblıkada Chehııa úlesi bar 150 kompanııa jumys isteıdi. Bul jóninde QR Ónerkásip jáne qurylys vıtse-mınıstri Oljas Saparbekov Qazaqstan – Chehııa bıznes forýmynda málimdedi.
– Bizdiń elderimiz otyz jyldan astam ýaqyttan beri berik ári ózara senimge qurylǵan qarym-qatynasta. Bul aralyqta ózara birlesip áreket etýdiń turaqty ınstıtýtsıonaldyq negizi qalandy. Ekonomıka, óndiris jáne ǵylymı-tehnıkalyq baǵyttarda áriptestik boıynsha Úkimetaralyq komıssııa negizgi ról atqarady, – dedi ol.
Sonymen birge, Chehııa Eýropanyń ındýstrııalyq turǵyda damyǵan memleketteriniń arasynda eleýli oryn alady. Ol, ásirese, mashına jasaý, avtokólik qurastyrý jáne ınjenerııa salalarynda ozyq.
Atalǵan eldiń Qazaqstan ekonomıkasyna tıgizip jatqan septigi de aıtarlyqtaı aýqymdy.
– 2025 jyldyń qorytyndysy boıynsha, elderimizdiń arasyndaǵy taýar aınalymy 700 mln dollardan asty. Sonyń ishinde óndiristik ónimniń úlesi shamamen 98%. Sońǵy 20 jylda Qazaqstan ekonomıkasyna 350 mln dollardan astam Chehııa ınvestıtsııasy quıyldy. Sonymen birge, búginde respýblıkada Chehııa úlesi bar 150 kompanııa jumys isteıdi, – dedi vıtse-mınıstr.
Aıta keteıik, buǵan deıin Chehııa 2050 jylǵa deıin 6 shaǵyn ıadrolyq reaktor ornatýdy josparlap otyrǵanyn jazǵanbyz.
