Qazaqstan men Chehııa arasynda ónerkásiptik yntymaqtastyq nyǵaıa túsedi
ASTANA.KAZINFORM — Chehııa bıznesi Qazaqstandaǵy ınvestıtsııalyq múmkindikterge qyzyǵýshylyq tanytty, dep habarlaıdy QR SІM baspasóz qyzmeti.
Qazaqstannyń Chehııa Respýblıkasyndaǵy elshisi Qaırat Ábdirahmanov «TATRA» jáne «ZETOR» mashına jasaý kompanııalarynyń, sondaı-aq taý-ken jabdyqtaryn óndirýshi «FERRIT», ónerkásiptik jabdyqtar óndiretin «ZVVZ Engineering» jáne ydystyq shyny óndirýge arnalǵan jabdyqtar shyǵaratyn «SKLOSTROJ» kompanııalarynyń ókilderimen birqatar alǵashqy kezdesý ótkizdi.
— Kezdesýler barysynda chehııalyq kásipkerler Qazaqstandaǵy seriktesterimen qalyptasqan yntymaqtastyqty joǵary baǵalap, onyń damýyna qanaǵattanýshylyq bildirdi. Sondaı-aq olar Qazaqstanda ınvestıtsııalyq ahýaldy odan ári jetildirýge baǵyttalǵan ózekti sharalar týraly aqparat aldy. Atalǵan reformalar Prezıdent Qasym-Jomart Toqaevtyń bastamasy jáne basshylyǵymen iske asyrylyp jatqan jańǵyrtýdyń jańa kezeńi sheńberinde júzege asyrylady, — delingen mınıstrlik taratqan aqparatta.
Qazaq dıplomattaryna kompanııalar tarapynan iske asyrylyp jatqan jobalardyń qazirgi jaı-kúıi, birlesken óndiristi jolǵa qoıý jáne elimizdegi birqatar óńirlerinde lokalızatsııalaý perspektıvalary jóninde málimet usynyldy. Cheh bıznesi usynatyn zamanaýı tehnologııalar ónerkásiptiń túrli salalarynda, onyń ishinde taý-ken sektorynda óndiristiń tıimdiligi men qaýipsizdigin arttyrýǵa múmkindik beredi.
Kezdesýler qorytyndysy boıynsha Chehııa óńirlerinde ornalasqan atalǵan kompanııalardyń óndiristik alańdaryna baryp kórý, bıznes-forýmdar uıymdastyrý, sondaı-aq ınvestıtsııalyq jobalardy iske asyrý múmkindikteri jóninde turaqty aqparat almasýdy qamtamasyz etý týraly ýaǵdalastyqqa qol jetkizildi.
Budan buryn Qazaqstan elshisi Chehııa prezıdentine senim gramotalaryn tapsyrǵany belgili boldy.