Qazaqstan men BUU DB: ornyqty damý jáne tıimdi basqarý baǵytyndaǵy seriktestik
ASTANA. KAZINFORM — QR Premer-mınıstriniń orynbasary – ulttyq ekonomıka mınıstri Serik Jumanǵarın Óńirlik ekologııalyq sammıt alańynda BUU Bas hatshysynyń kómekshisi, BUU Damý Baǵdarlamasy (BUUDB) ákimshisiniń orynbasary Haolıan Shýmen kezdesti. Bul týraly Úkimet málim etti.
Serik Jumanǵarın BUUDB Qazaqstannyń ornyqty damýdy, ınstıtýtsıonaldyq reformalardy jáne óńirlik saıasatty ilgeriletýdegi negizgi áriptesiniń biri bolyp qala beretinin atap ótti.
— Qazirgi ýaqytta biz óńirlik damýǵa, «jasyl» transformatsııaǵa jáne memlekettik basqarýdyń tıimdiligin arttyrýǵa baǵyttalǵan BUUDB-nyń 2021–2025 jyldarǵa arnalǵan Eldik baǵdarlamasyn birlesip iske asyryp jatyrmyz, — dep atap ótti ol.
Óz tarapynan Haolıan Shý Qazaqstandy jańa Konstıtýtsııanyń qabyldanýymen quttyqtady. Ol sondaı-aq BUUDB-nyń bastamalardy odan ári birlesip damytýǵa daıyn ekendigin atap ótti. Kezdesý barysynda qazaqstandyq tarap óńirlik saıasattyń basymdyqtaryn da atap ótti.
Atap aıtqanda, óńirlik standarttar júıesine (ÓSJ) negizdelgen jańa bıýdjettik model óńirler ishinde áleýmettik, kóliktik ınfraqurylymdy damytýdaǵy teńgerimsizdikti qysqartýǵa baǵyttalǵany atap ótildi. ÓSJ-niń negizgi maqsaty — eldi mekenderdegi ómir súrý jaǵdaıyn teńestirý, ásirese aýyldyq jerde jumyspen qamtýdy arttyrý jáne halyqtyń ómir súrý sapasyn jaqsartý.
Aıta keteıik, Serik Jumanǵarın Dúnıejúzilik bankpen jańa ınvestıtsııalyq jobalardy talqylaǵan bolatyn.
