Qazaqstan men BUUDB bilim berý jáne jastardy qoldaý baǵytyndaǵy yntymaqtastyqty keńeıtedi
ASTANA. KAZINFORM – Qazaqstan Respýblıkasynyń Oqý-aǵartý mınıstri Juldyz Súleımenova Birikken Ulttar Uıymynyń Damý baǵdarlamasynyń (BUUDB) Qazaqstandaǵy Turaqty ókili Katarjına Vavernıamen kezdesti, dep habarlaıdy mınısrliktiń baspasóz qyzmeti.
Kezdesý barysynda taraptar bilim berý, balalar men jastardy qoldaý salalaryndaǵy yntymaqtastyqtyń perspektıvaly baǵyttaryn talqylady.
BUUDB mektepke deıingi jáne bastaýysh bilim berýdi qoldaý sharalarynyń tıimdiligin baǵalaý boıynsha taldamalyq jumystar júrgizýdi josparlap otyr. Onyń ishinde vaýcherlik qarjylandyrý tetikterin taldaý máseleleri de qamtylady.
Yqtımal yntymaqtastyq baǵyttarynyń biri retinde jastarǵa kásibı baǵdar berý jáne bilim almaıtyn ári jumyspen qamtylmaǵan jastardy, sonyń ishinde kolledj stýdentterin qoldaý máseleleri qarastyrylýda.
Bastamalar aıasynda mansap ortalyqtaryn damytý, sondaı-aq oqýshylar men stýdentterdiń jeke mansaptyq traektorııalaryn qalyptastyrý men qoldaý tetikterin jetildirý usynyldy.
Taraptar jastar arasyndaǵy quqyq buzýshylyqtardyń, býllıngtiń jáne genderlik zorlyq-zombylyqtyń aldyn alýǵa baǵyttalǵan tsıfrlyq sheshimderdi de talqylady.
Bul baǵyttaǵy jumystyń bilim berý júıesi, ishki ister organdary, áleýmettik qorǵaý salasy jáne ózge de múddeli memlekettik organdar arasyndaǵy vedomstvoaralyq ózara is-qımyldy talap etetini atap ótildi.
Balalar men otbasylarǵa qatysty táýekelderdi erte anyqtaý jáne olarǵa ýaqtyly qoldaý kórsetý máselelerinde mektep psıhologteriniń, synyp jetekshileriniń jáne bilim berý uıymdary ákimshiliginiń róline erekshe nazar aýdaryldy.
BUUDB atalǵan bastamalardy iske asyrýǵa qatysýǵa daıyn ekenin rastady. Kezdesý qorytyndysy boıynsha taraptar bilim berý salasyndaǵy yntymaqtastyqty odan ári damytýǵa ózara múddeli ekenin atap ótti.
