Qazaqstan men Brazılııa SІM basshylary Astanada kelissóz ótkizdi
ASTANA. KAZINFORM – Brazılııa Syrtqy ister mınıstri Maýro Vıeıra resmı saparmen Astanaǵa keldi. Sapar aıasynda Qazaqstan men Brazılııanyń syrtqy saıası vedomstvo basshylary kelissóz júrgizdi.
Keńeıtilgen quramdaǵy kezdesýde taraptar ekijaqty qatynastardyń negizgi baǵyttar boıynsha damyp kele jatqanyn atap ótti.
Qazaqstan Respýblıkasy Syrtqy ister mınıstri Ermek Kósherbaev Astananyń Brazılııany mańyzdy seriktesterdiń biri retinde qarastyratynyn aıtty.
– Bıyl elderimiz dıplomatııalyq qatynastardyń ornaǵanyna 33 jyl tolýyn atap ótedi. Osy ýaqyt ishinde saıası dıalogty nyǵaıtýǵa, saýda men halyqaralyq uıymdar aıasyndaǵy ózara is-qımyldy damytýǵa turaqty umtylys qalyptasty. Biz ekijaqty jáne ınstıtýtsıonaldyq áriptestikti odan ári tereńdetýimiz kerek, – dedi Ermek Kósherbaev.
Mınıstr Brazılııa prezıdentiniń Qazaqstanǵa sońǵy resmı saparynan beri 17 jyl ótkenin de atap ótti.
– Biz Prezıdent Lýlany Qazaqstanda qarsy alýǵa múddelimiz. Sońǵy jyldary parlamentaralyq baılanystar da jandandy. Brazılııa parlamentiniń ókilderi Astanaǵa kelip, dostyq toptarynyń kezdesýlerine qatysty, – dedi ol.
Sonymen qatar Ermek Kósherbaev eki el bıznes ókilderi ekonomıkalyq yntymaqtastyqty keńeıtý perspektıvalaryn talqylaıdy degen úmit bildirdi.
Óz kezeginde Maýro Vıeıra Brazılııa prezıdenti Lýıs Inasıý Lýla da Sılvanyń Qazaqstan Prezıdenti Qasym-Jomart Toqaevqa izgi tilegin joldaǵanyn jáne ekijaqty qatynasty nyǵaıtýǵa múddeli ekenin jetkizdi.
– Munda bolyp, ózara qyzyǵýshylyq týdyratyn máselelerdi talqylaý men úshin úlken mártebe. Bizdi geografııalyq turǵyda úlken qashyqtyq bólip turǵanymen, Qazaqstanmen jáne jalpy Ortalyq Azııamen saýda, saıasat jáne mádenıet salalaryndaǵy baılanystardy nyǵaıtqymyz keledi, – dedi Maýro Vıeıra.
Onyń aıtýynsha, Brazılııa Qazaqstannan tyńaıtqysh ımportyn ulǵaıtýǵa jáne agrarlyq sektordaǵy yntymaqtastyqty damytýǵa qyzyǵýshylyq tanytyp otyr.
– Brazılııa – iri aýyl sharýashylyǵy óndirýshisi. Biz bul baǵyttaǵy yntymaqtastyqty, sondaı-aq janýar aqýyzy men ózge de saýda salalaryndaǵy ózara is-qımyldy keńeıtkimiz keledi, – dedi mınıstr.
Maýro Vıeıra Qazaqstanǵa munaı salasyndaǵy iri brazılııalyq kompanııalardyń ókilderi kirgen jeke sektor delegatsııasy da kelgenin habarlady.
Aıta keteıik, Brazılııa Latyn Amerıkasy jáne Karıb basseıni elderi arasynda Qazaqstannyń eń iri saýda seriktesi sanalady. Eki el arasyndaǵy taýar aınalymy búginde 296 mln dollardy quraıdy.
Eske salaıyq, Vashıngtonda «Qaraǵandy – Jezqazǵan» avtojolynyń jobasy boıynsha kelisimge qol qoıyldy.
