Qazaqstan men Brazılııa atom energııasy týraly shart jasaspaq
Brıfıng barysynda Elshi aǵymdaǵy jyly «Qazatomónerkásip» kompanııasy brazılııalyq «Indústrias nucleares do Brasil» (INB) kompanııasyna tabıǵı ýran kontsentratyn jetkizý boıynsha tenderde jeńip shyqqanyn, kelisim shartttarǵa sáıkes Qazatomónerkásip belgilengen merzimde ýran jetkizip bergenin aıtty. https://kaz.inform.kz/news/kazakstan-algash-ret-braziliyaga-uran-zhetkizdi_a3261840
«Qazaqstanǵa saparǵa shyǵar aldynda INB prezıdentimen kezdestim. Bizdiń ulttyq kompanııamen yntymaqtastyq múmkinshilikterin jan-jaqty talqyladyq. Brazılııalyq mamandar qazaqstandyq sarapshylardy Rıo-de-Janeırodaǵy atom stansasyna kelýge shaqyrady jáne qazaqstandyq tabıǵı ýran kontsentratyn odan ary ımporttaýǵa múddelik tanytyp otyr. Degenmen, mundaı protsedýra Brazılııa zańnamasyna sáıkes tender arqyly júzege asyrylady. Olar tenderdiń jarııalanatyndyǵyn nemese jarııalanbaıtyndyǵyn ázirshe bilmeıdi. Biraq, ondaı tender jarııa etile salysymen biz qajetti qujattardy beremiz»,- dedi Elshi.
Sonymen qatar, Qaırat Sarjanov atom energııasyn beıbit maqsatta paıdalaný salasyndaǵy yntymaqtastyq týraly kelisim jobasy kelisilip jatqanyn aıtty. Jalpy, Brazılııa búginde ıadrolyq tehnologııanyń tolyq tsıkline ıe bolyp otyrǵan 10 eldiń biri sanalady.
Aıta keteıik, aǵymdaǵy jyldyń qańtar-tamyzynda Qazaqstan men Brazılııa arasyndaǵy taýar aınalymynyń kólemi 82,3 mln dollardy qurady. Qazaqstan Brazılııadan qant, tabak, ushaq, mashına jabdyqtary men onyń bólshekterin, qurylys materıaldaryn alady. Al elimizden Brazılııaǵa temir men kremnııdiń ferroqorytpasy, plastmass buıymdar, rezeńke men qara metall eksporttalady.
