Qazaqstan men Bolgarııa arasyndaǵy saýda kólemin arttyrý máselesin sheshý kerek - QR Prezıdenti

ASTANA. QazAqparat - Búgin Aqordada Qazaqstandaǵy birqatar elderdiń elshilerinen senim gramotalaryn qabyldaý kezinde Elbasy Nursultan Nazarbaev Bolgarııamen arada saýda kólemin arttyrýdy tapsyrdy.

«Qazaqstan men Bolgarııany dástúrli dostyq qarym-qatynas baılanystyryp otyr. Elderimizdiń arasynda berik quqyqtyq sharttar bazasy jasalǵan, úkimetaralyq baılanystar ornatylǵan, parlamentaralyq yntymaqtastyq belsendi damyp keledi. Bizdiń osy saıası dıalogymyz ekonomıkalyq jáne mádenı-gýmanıtarlyq yntymaqtastyq arqyly bekı túsýde»,-dedi Prezıdent.

Elbasy Qazaqstandaǵy bolgar qaýymy týraly da sóz qozǵady.

«Qazaqstanda myńdaǵan bolgardyń turyp jatqany belgili. Alaıda, Qazaqstan men Bolgarııanyń arasyndaǵy ózara saýda kólemi áli kóńilden shyqpaıdy, sondyqtan bul máseleni birge sheshemiz dep senemin», - dedi Memleket basshysy.