Qazaqstan men Bolgarııa arasyndaǵy áýe qatynasy keńeıedi
ASTANA. QazAqparat - Elordada Qazaqstan men Bolgarııanyń avıatsııalyq bılik organdary arasynda resmı kelissózder boldy, dep habarlaıdy QazAqparat tilshisi.
QR IDM Azamattyq avıatsııa komıtetiniń tóraǵasy Talǵat Lastaev Bolgarııa Respýblıkasynyń Kólik, aqparattyq tehnologııalar jáne baılanys mınıstrligi Eýropalyq úılestirý jáne halyqaralyq yntymaqtastyq jónindegi dırektsııasynyń dırektory Nadejda Býhova hanym bastaǵan Bolgar eliniń delegatsııasymen kezdesti. Kelissózderge Qazaqstan Respýblıkasyndaǵy Bolgarııa Respýblıkasynyń Tótenshe jáne Ókiletti Elshisi Vasıl Petkov ta qatysty.
Kelissózderdiń nátıjesinde Qazaqstan Respýblıkasy men Bolgarııa Respýblıkasy arasyndaǵy áýe qatynasy týraly úkimetaralyq Kelisimniń jańa mátini «gorızontaldy» Kelisimniń elementterimen belgilendi. Ózara túsinistik týraly memorandýmǵa qol qoıylyp, onyń negizinde elderdiń taǵaıyndalǵan áýe kompanııalary aptasyna 3 reıs, eki el arasynda barlyǵy 6 reısti oryndaýǵa múmkindik aldy.
Sondaı-aq, ár el aýmaǵynda turaqty reısterge arnalǵan pýnktilerdi anyqtaý týraly kelisimge qol jetkizildi. Osylaısha, qazaqstandyq tasymaldaýshylar Bolgarııa astanasy - Sofııa qalasyna jáne Býrgas, Varna sııaqty kýrortty qalalaryna usha alady. Sonymen qatar, Bolgarııanyń taǵaıyndalǵan áýe kompanııalary Qazaqstannyń Astana, Almaty, Shymkent sııaqty «mıllıondy-qalalaryna» ushýǵa múmkindik aldy.
Bolgarııa - qazaqstandyq jolaýshylar úshin belgili týrıstik baǵyt. Sońǵy jyldary Bolgarııa tarapy maýsymdyq týrıstik reısterdi júzege asyryp júr.
Jańa kelisimderge qol jetkizý tikeleı turaqty reıster ashýdy jeńildetedi.
