Qazaqstan men Bolgarııa arasynda adamdardy ustap berý týraly shart maquldandy - Májilis
«Qujatty ratıfıkatsııalaý bizdiń elimizdiń aýmaǵynda qylmys jasaǵan tulǵalardy Bolgarııaǵa, Bolgarııada júrgen qylmyskerlerdi elimizge ekstradıtsııalaýǵa múmkindik beredi. Kelisimniń sharttaryna sáıkes, eki elde de qylmys dep tanylatyn qylmystyq áreketterdi júzege asyrǵany úshin jáne sol qylmysy úshin bir jyldan kem bolmaıtyn jazalar qarastyrylatyn tulǵalardy ustap berý júzege asatyn bolady. Eger suraý salynatyn tulǵa sottalǵan bolǵan bolsa, onda onyń jazasyn óteý merziminiń aıaqtalýyna alty aı shamasynda merzim qalǵan bolýy kerek», - dedi QR Bas prokýrorynyń orynbasary Iogan Merkel.
Onyń aıtýynsha, zań jobasynda ustap berýden bas tartýdyń birqatar sharttary qamtylǵan. Máselen, eger suraý salynǵan tulǵaǵa saıası baspana berilgen bolsa ondaı tulǵalar ustap berýge jatpaıdy. Sonymen qatar, izdestirilgen tulǵany qýdalaý násildik, dinı, ulttyq, saıası jáne áleýmettik sıpatta bolyp tabylatyndyǵyna negizder baıqalsa, ondaı adamdardy ustap berýden bas tartylýy múmkin. Tutastaı alǵanda adamdardy ustap berý týraly shart taraptarǵa ekinshi memlekettiń nemese sonyń aýmaǵynda jasyrynyp júrgen tulǵalardy ekstradıtsııalaýdy talap etýge múmkindik beredi. Májilis maquldaǵan zań jobasy Parlament Senatyna joldanady.