Qazaqstan men Belgııa Parkınson aýrýyn erte anyqtaıtyn jasandy ıntellekt ázirleıdi
ASTANA. KAZINFORM — Qazaqstandaǵy Alem.ai ortalyǵynda Astana Hub pen Belgııanyń Gent ýnıversıteti jasandy ıntellekt jáne matematıka boıynsha birlesken zerthana ashady. Ǵalymdar Parkınson aýrýyn erte anyqtaýǵa arnalǵan JI sheshimin ázirlep, neırotehnologııalardy bilim berý salasynda qoldanýdy zertteıdi.
QR Jasandy ıntellekt jáne tsıfrlyq damý mınıstrliginiń qoldaýymen AI Labs tujyrymdamasy aıasynda Astana Hub pen Gent ýnıversıteti (Belgııa) Alem.ai ortalyǵynda jasandy ıntellekt jáne matematıka boıynsha birlesken zerthana ashady. Zerthana eki eldiń ǵalymdaryn birlesken zertteýler júrgizý, talanttardy daıarlaý, startaptar qurý jáne halyqaralyq qarjylandyrý tartý úshin biriktiredi.
Vedomstvonyń málimetinshe, zerthana Alem.ai alańynda álemniń jetekshi ýnıversıtetterimen birlesken zertteýlerdi damytýǵa baǵyttalǵan AI Labs tujyrymdamasynyń quramdas bóligine aınalady.
Matematıka — jasandy ıntellekttiń (JI) negizi: kez kelgen JI-modelin oqytý ońtaılandyrý ádisterine, statıstıkaǵa jáne yqtımaldyqtar teorııasyna súıenedi. Sondyqtan zerthana irgeli matematıkany jasandy ıntellekttiń qoldanbaly mindetterimen ushtastyrady.
— Gent ýnıversıtetiniń jáne Qazaqstannyń ǵalymdary, sonyń ishinde qazaqstandyq ǵylymı dıaspora ókilderi, birlesken zertteý jobalary júzege asyryp, jańa JI-tehnologııalardy ázirleıdi jáne jas zertteýshilerdi daıarlaıdy. Alǵashqy baǵyttar - jekelendirilgen oqytýda jasandy ıntellekt pen neırotehnologııalardy qoldaný jáne Parkınson aýrýyn erte anyqtaýǵa arnalǵan JI negizindegi sheshimdi ázirleý, — delingen habarlamada.
Resmı sapar aıasynda ǵaryshty zertteýge jáne ǵylymı yntymaqtastyqty damytýǵa jańa múmkindikter ashatyn teleskopty tabystaý rásimi de ótti.
Taraptar Horizon Europe baǵdarlamasynyń granttaryna birlesip ótinim berýdi jáne zerthananyń zertteýleri men ázirlemelerine ınvestıtsııa tartýdy josparlap otyr.
Zerthana jumysynyń basty nátıjeleri — jasandy ıntellekt pen matematıka salasyndaǵy jańa talanttar, tehnologııalyq startaptar jáne birlesken ǵylymı jobalar.
Anyqtama retinde
Gent ýnıversıteti (Universiteit Gent) — 1817 jyly qurylǵan, Belgııanyń jetekshi zertteý ýnıversıtetteriniń biri.
Horizon Europe — Eýropalyq Odaqtyń 2021–2027 jyldarǵa arnalǵan zertteýler men ınnovatsııalardy qarjylandyrý jónindegi negizgi baǵdarlamasy.
Eske sala keteıik, buǵan deıin Qazaqstan men Belgııa Kaspıı teńiziniń ekologııasyn saqtaý boıynsha yntymaqtastyqty kúsheıtetinin jazdyq.
