Qazaqstan men Belgııa Kaspıı teńiziniń ekologııasyn saqtaý boıynsha yntymaqtastyqty kúsheıtpek
ASTANA. KAZINFORM — Qazaqstan men Belgııa ekologııa jáne klımat salasyndaǵy áriptestikti keńeıtýge nıetti. Taraptar Kaspıı teńiziniń ekologııalyq jaǵdaıyn, ónerkásipti dekarbonızatsııalaý jáne tómen kómirtekti ekonomıkany damytý máselelerin qarastyrdy.
Belgııa Koroli Fılıpp pen Koroleva Matıldanyń Qazaqstan Respýblıkasyna memlekettik sapary aıasynda QR Ekologııa jáne tabıǵı resýrstar mınıstri Álibek Qýantyrov Belgııanyń utqyrlyq, klımat jáne ekologııalyq ótpeli kezeń máseleleri jónindegi mınıstrimen ekijaqty kezdesý ótkizdi.
Kezdesý barysynda taraptar qorshaǵan ortany qorǵaý, klımattyń ózgerýine qarsy is-qımyl, ónerkásipti dekarbonızatsııalaý jáne ornyqty damý salalaryndaǵy ekijaqty yntymaqtastyqtyń qazirgi jaı-kúıi men ony odan ári keńeıtý perspektıvalaryn talqylady.
Kelissózder barysynda zamanaýı ekologııalyq tehnologııalardy engizý, tómen kómirtekti ekonomıkany damytý jáne ónerkásiptik kásiporyndardyń ekologııalyq tıimdiligin arttyrý máselelerine erekshe nazar aýdaryldy. Qazaqstan tarapy ónerkásipti dekarbonızatsııalaý, tsırkýlıarlyq ekonomıkany damytý, qaldyqtardy basqarý jáne resýrstardy tıimdi paıdalaný baǵyttarynda Belgııanyń ozyq tájirıbesin zerdeleýge qyzyǵýshylyq bildirdi.
Sonymen qatar taraptar Eýropalyq Odaqtyń kómirtegi shyǵaryndylaryn transshekaralyq retteý tetigin (CBAM) engizýge qatysty máselelerdi qarastyryp, jahandyq tómen kómirtekti damý jaǵdaıynda tehnologııalyq jáne ınvestıtsııalyq yntymaqtastyqty keńeıtý múmkindikterin talqylady.
Kezdesý aıasynda Kaspıı teńiziniń ekologııalyq jaǵdaıyna aıryqsha kóńil bólindi. Qazaqstan tarapy teńiz deńgeıiniń tómendeýi, jaǵalaý syzyǵynyń ózgerýi jáne atalǵan úderisterdiń bıoalýantúrlilikke, jaǵalaý ekojúıelerine, sondaı-aq óńirdiń áleýmettik-ekonomıkalyq damýyna tıgizetin yqtımal áserlerine nazar aýdardy.
Osyǵan baılanysty Kaspıı teńiziniń ekojúıesin saqtaý maqsatynda ǵylymı zertteýlerdi jandandyrý, ekologııalyq monıtorıng júıesin jetildirý jáne halyqaralyq ǵylymı-tehnıkalyq yntymaqtastyqty nyǵaıtý qajettigi atap ótildi.
Budan bólek, taraptar halyqaralyq klımattyq kún tártibindegi ózekti máseleler, onyń ishinde Túrkııada ótetin BUU-nyń Klımattyń ózgerýi týraly negizdemelik konventsııasy Taraptarynyń 31-konferentsııasyna (COP31) daıyndyq máseleleri boıynsha pikir almasty.
Kezdesýge qatysýshylar parnıktik gazdar shyǵaryndylaryn qysqartý, bıoalýantúrlilikti saqtaý, klımattyń ózgerýine beıimdelý jáne ekologııalyq ornyqtylyqty qamtamasyz etý baǵyttarynda halyqaralyq áriptestikti nyǵaıtýdyń mańyzdylyǵyn atap ótti.
Kezdesý qorytyndysy boıynsha taraptar Qazaqstan men Belgııa arasyndaǵy ekologııalyq yntymaqtastyqty odan ári damytýǵa, ózara tájirıbe almasýdy keńeıtýge jáne birlesken bastamalardy iske asyrý múmkindikterin qarastyrýǵa daıyn ekendikterin rastady.
Aıta keteıik, buǵan deıin Belgııa Koroli Qazaqstannyń lıtıı men nıkeldi óńdeý tehnologııalaryna qyzyǵýshylyq tanytqanyn jazdyq.
