Qazaqstan men Belgııa arasynda sheshilmegen másele joq — Qasym-Jomart Toqaev
ASTANA. KAZINFORM — Memleket basshysy Qasym-Jomart Toqaev pen Belgııalyqtar Koroli Fılıpp Aqordada BAQ ókilderine arnalǵan brıfıng ótkizdi. Olar Qazaqstan men Belgııa arasyndaǵy seriktestikti nyǵaıtýǵa daıyn ekenin rastady.
Memleket basshysy Belgııalyqtar Koroli men Patshaıymynyń Qazaqstanǵa jasaǵan tarıhı memlekettik sapary ekijaqty qarym-qatynastyń jańa paraǵyn ashatynyn jáne qos halyq arasyndaǵy dostyqty nyǵaıta túsetinin atap ótti.
— Asa mártebeli Korol, Sizdiń parasatty ári batyl basshylyǵyńyzdyń arqasynda Belgııa óziniń biregeı sanalýandyǵyn saqtaǵan ári álemge ashyq el retinde belgili bolyp otyr. Halqyńyzǵa adaldyǵyńyz ben Belgııadaǵy túrli qaýym arasyndaǵy ózara túsinistikti nyǵaıtý jolyndaǵy tabandy eńbegińiz Tájdiń yntymaqqa bastar rólin aıqyndaıdy. Osy kúrdeli kezeńde adamı qadir-qasıeti bıik, perzenttik paryzdyń parqyn sezinetin tulǵa ekenińizdi kórsettińiz. Bul erekshe senim uıalatady ári zor qurmetke laıyq. Uzaq jyldar boıǵy dostyǵyńyzǵa jáne Qazaqstanmen baılanystardy nyǵaıtý nıetińizge rızamyn. Búgin osy yqpaldastyqty tereńdetýge birlese úles qosatynymyzǵa qýanyshtymyn. Sizdiń kúsh-jigerińiz ben qoldaýyńyzdyń arqasynda yntymaqtastyǵymyzdyń keleshegine úlken úmitpen ári senimmen qaraımyz, — dedi Prezıdent.
Qasym-Jomart Toqaev emen-jarqyn dostyq ráýishte ári syndarly sıpatta ótken nátıjeli kelissózderdiń qorytyndysyna toqtaldy.
— Biz Qazaqstan men Belgııa arasyndaǵy kópjaqty seriktestikti kúsheıtýge beıil ekenimizdi rastadyq. Elderimiz arasynda qandaı da bir saıası qaıshylyq nemese sheshilmegen másele joq. Bul barlyq baǵytta yntymaqtastyqty keńeıtýge berik negiz qalaıdy. Ekonomıkalyq yqpaldastyq seriktestigimizdiń negizgi tiregi bolyp qala beredi. Belgııa Qazaqstannyń jetekshi ınvestıtsııalyq seriktesteriniń qataryna kiredi. Sizdiń eldiń 2005 jyldan beri ekonomıkamyzǵa quıǵan ınvestıtsııa kólemi 15 mıllıard dollardan asty. Kólik-logıstıka, asa mańyzdy mıneraldar, energetıka, ónerkásip, aýyl sharýashylyǵy, bıotehnologııa, tsıfrlandyrý jáne ǵarysh tehnologııalary salalarynda yqpaldastyqty jandandyryp, jańa múmkindikterdi qolǵa alýǵa ýaǵdalastyq. Tarıhı saparǵa belgııalyq jetekshi kompanııa ókilderi qatysýda. Bul Belgııanyń elimizdiń ekonomıkalyq áleýetine zor senim artatynyn kórsetedi. Úkimet tarapynan Belgııa ınvestorlarynyń Qazaqstanda qyzmet aıasyn keńeıtýine jáne jańa perspektıvti jobalardy iske asyrýyna qolaıly jaǵdaı jasalady. Onyń tolyq ári ýaqytyly oryndalýyn ózim qadaǵalap otyramyn, — dedi Memleket basshysy.
Prezıdenttiń aıtýynsha, erteńge josparlanǵan Qazaqstan-Belgııa iskerlik keńesi, Rektorlar forýmy jáne asa mańyzdy materıaldar boıynsha dóńgelek ústel ortaq maqsattar men naqty nátıjelerge qol jetkizetin mańyzdy alań bolmaq.
Atalǵan is-sharalardyń qorytyndysy boıynsha seriktestikti damytýǵa tyń serpin beretin ondaǵan kelisim men qujatqa qol qoıylady.
Aıta keteıik, buǵan deıin 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótetini habarlandy.
Sapar baǵdarlamasy tórt negizgi baǵytty qamtıdy. Olar — asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Belgııanyń federaldyq mınıstri Jan-Lıýk Krıýıke qazaqstandyqtar qyzmettik pasportpen Eýropanyń úsh eline vızasyz bara alatynyn málimdegen edi.
Ǵylym jáne joǵary bilim mınıstri Saıasat Nurbek Belgııanyń 12 ýnıversıtetimen kelisimshart ornatylatynyn aıtty.
