Qazaqstan men Belgııa aldaǵy úsh jylǵa arnalǵan yntymaqtastyq josparyn bekitti
ASTANA. KAZINFORM — Qazaqstan men Belgııa syrtqy ister mınıstrlikteri arasyndaǵy 2027-2029 jyldarǵa arnalǵan yntymaqtastyqtyń Jol kartasyna qol qoıdy.
SІM baspasóz qyzmetiniń málimetinshe, Belgııa Koroli Fılıpptiń Qazaqstanǵa memlekettik sapary aıasynda Qazaqstan Respýblıkasy Syrtqy ister mınıstriniń birinshi orynbasary Erjan Ashyqbaev Belgııa Koroldiginiń Syrtqy ister, syrtqy saýda jáne damý maqsatyndaǵy yntymaqtastyq jónindegi federaldyq memlekettik qyzmeti Basqarýshy komıtetiniń tóraǵasy Teodora Djenttsıspen kezdesti.
— Kezdesý aıasynda Qazaqstan men Belgııanyń syrtqy ister mınıstrlikteri 2027-2029 jyldarǵa arnalǵan yntymaqtastyqtyń jol kartasyna qol qoıdy. Qujat saıası dıalogty jandandyrýdy, turaqty konsýltatsııalar ótkizýdi, vedomstvoaralyq baılanystardy nyǵaıtýdy jáne ekijaqty ózara is-qımyldyń basym baǵyttary boıynsha birlesken bastamalardy ilgeriletýdi kózdeıdi, — delingen mınıstrlik taratqan aqparatta.
Kezdesý barysynda taraptar qazaq-belgııa qatynastarynyń qazirgi jaı-kúıi men damý perspektıvalaryn talqylap, Belgııa monarhynyń Qazaqstanǵa alǵashqy memlekettik saparynyń tarıhı mańyzyn jáne onyń ekijaqty áriptestikti odan ári nyǵaıtýdaǵy rólin atap ótti.
Taraptar sondaı-aq Qazaqstannyń Eýropalyq odaqpen ózara is-qımylynyń ózekti máselelerin, onyń ishinde vızalyq rejımdi jeńildetý jáne readmıssııa týraly kelisimderge qol qoıý perspektıvalaryn, sondaı-aq ekijaqty sharttyq-quqyqtyq bazany odan ári jetildirý máselelerin qarastyrdy.
BUU aıasyndaǵy yntymaqtastyqty, halyqaralyq qaýipsizdikti nyǵaıtýdy, kópjaqty bastamalardy ilgeriletýdi qosa alǵanda, halyqaralyq jáne óńirlik kún tártibiniń negizgi máseleleri boıynsha pikir almasý ótti.
Kezdesý sońynda taraptar qazaq-belgııa yntymaqtastyǵyn odan ári tereńdetýge jáne qol jetkizilgen ýaǵdalastyqtardy is júzinde júzege asyrýǵa, onyń ishinde 2027 jyly Qazaqstan men Belgııa arasyndaǵy dıplomatııalyq qatynastardyń ornaǵanyna 35 jyl tolýy qarsańynda ózara múddeliligin rastady.
Buǵan deıin Joǵary mártebeli Qazaqstan Respýblıkasynyń Prezıdenti Qasym-Jomart Toqaev pen Asa mártebeli Belgııalyqtar Koroli Fılıpptiń birlesken málimdemesi jarııalandy.
