Qazaqstan men Belarýs saýda salasynda uzaqmerzimdi jospardy qabyldaıdy – Qasym-Jomart Toqaev

NUR-SULTAN. QazAqparat – Eýrazııalyq ekonomıkalyq odaqtyń zor múmkindikterin paıdalanyp, qazirgi kórsetkishterimizdi odan ári arttyrýymyz kerek. Bul týraly búgin Aqordada Belarýs Prezıdenti Aleksandr Lýkashenkomen kelissózderden keıingi birlesken málimdeme barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Elderimizdiń qazirgi qarym-qatynasy ózara memleketaralyq yqpaldastyq aıasynda tabysty ári tıimdi damyp kele jatyr. Onyń negizin QR Tuńǵysh Prezıdenti — Elbasy Nursultan Nazarbaev jáne Belarýs Respýblıkasynyń Prezıdenti qalady. Sondyqtan bul sapardy Qazaqstan men Belarýs arasyndaǵy jemisti strategııalyq seriktestiktiń jalǵasy dep sanaımyn», - dedi QR Memleket basshysy.

Osy oraıda Q. Toqaev búgin Aqordada shaǵyn jáne keńeıtilgen quramda kelissózder júrgizilgenin, ekijaqty jáne óńirlik, halyqaralyq máseleler talqylanǵanyn, ózara baılanystyń birqatar mańyzdy baǵyttary boıynsha ortaq pikir bolǵanyn atap ótti.

«Eń aldymen, saýda-ekonomıka salasyndaǵy yntymaqtastyqty damytý múmkindikterin talqyladyq. Byltyrdyń qorytyndysy boıynsha ózara saýda kólemi shamamen 800 mln dollar boldy. Bul jaqsy úrdis, biraq jetkilikti emes. Sondyqtan bul jumys keleshekte de jalǵasyn tabady dep úmittenemin. Sonymen qatar, Eýrazııalyq ekonomıkalyq odaqtyń zor múmkindikterin paıdalanyp, qazirgi kórsetkishterimizdi odan ári arttyrýymyz kerek. Úkimetterimiz eki elge jetkizilgen taýarlardyń sanyn kóbeıtý, ózara saýda-sattyqty ulǵaıtý máselelerin pysyqtaýy tıis. Bul baǵytta bir-birimizge qolaıly jaǵdaı jasaýdyń mańyzy zor. Osyǵan oraı arnaıy uzaqmerzimdi jospardy qabyldaımyz dep ýaǵdalastyq», - dedi QR Prezıdenti.