Qazaqstan men Belarýs ózara professorlar men oqytýshylardy salyqtan bosatady
Bul týraly Senattyń jalpy otyrysynda zań jobasyn talqylaý kezinde QR Qarjy mınıstri Baqyt Sultanov málim etti, dep habarlaıdy QazAqparat.
Otyrysta palata depýtattary «Qazaqstan men Belarýs úkimetteri arasyndaǵy 1997 jylǵy sáýirdegi tabys pen múlikke qosarlanǵan salyq salýdy boldyrmaý jáne salyqtan jaltarýǵa jol bermeý týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Zańyn qabyldady.
«Hattama aqparat almasýdy keńeıtý jolymen salyq qyzmetteri arasyndaǵy yntymaqtastyqty nyǵaıtýǵa múmkindik beredi. Al ekinshiden, rezıdenttikti rastaıtyn qujattardyń qoltańbasy men mórin zańdastyrý jónindegi talaptardy joıý arqyly eki memlekettiń rezıdentteri úshin kelisimniń qoldaný tártibin jeńildetý eskerilgen.
Úshinshiden, shet memlekette jumys isteıtin professorlardy, oqytýshylar men ǵylymı qyzmetkerlerdi alǵashqy eki jyl boıy salyq salýdan bosatý arqyly tájirıbe almasýdy kúsheıtý, sondaı-aq eki el arasyndaǵy yntymaqtastyqty odan ári damytýdy qosymsha yntalandyrý qarastyrylǵan», - dedi zań jobasy boıynsha baıandamaǵa jasaǵan Qarjy mınıstri Baqyt Sultanov.
Sonymen qatar mınıstr Hattamaǵa oqıtyn memleketinde stýdentterge granttar, stıpendııalar men jaldanyp isteıtin jumystan alatyn syıaqylar boıynsha jeńildikterge jáne shegerimderge quqyq beretin qolaıly jaǵdaı jasalǵanyn atap ótti.
Budan basqa, Hattamada kelisimde qoldanylatyn Qazaqstan jáne Belarýs salyqtarynyń ataýlary jańǵyrtyldy. Osy oraıda «Protsentter» jáne «Roıaltı», «Táýelsiz jeke qyzmetter» baptarynyń erejeleri naqtylandy.
«Qazaqstan men Belarýs Respýblıkasy arasyndaǵy taýar aınalymy sońǵy 10 jylda 6,4 mlrd AQSh dollaryn qurady. Qazaqstandyq eksporttyń negizgi baptarynda óńdelmegen alıýmınıı men temirden nemese qospalanǵan bolattan jasalatyn tegis ılem qamtylǵan. Import qurylymynda aýyl sharýashylyǵy tehnıkasy (traktorlar), qant qyzylshasy, shınalar jáne pnevmatıkalyq rezeńke tystar jáne jıhaz basymdyqqa ıe. Hattamany iske asyrý memlekettik bıýdjetten qarjy shyǵyndaryn talap etpeıdi. Osy qujattyń eki memleket arasyndaǵy salyq salý máselelerinde zańnamalyq baza retindegi mańyzdy rólin de atap ótkim keledi», - dedi mınıstr.
