Qazaqstan men Belarýs quny 100 mln dollar bolatyn 4 jobany iske qospaq
Qazaqstan men Belarýs Premer-Mınıstrleri ónerkásiptik kooperatsııa jobalaryn júzege asyrýdy talqylady, dep habarlaıdy QR Úkimetiniń baspasóz qyzmeti.
Qazaqstan Premer-Mınıstri Álıhan Smaıylov pen Belarýs Premer-Mınıstri Roman Golovchenko saýda-ekonomıkalyq yntymaqtastyqty nyǵaıtý máselelerin talqylady. Kezdesý «INNOPROM. Qazaqstan» halyqaralyq ónerkásip kórmesi qarsańynda ótti.
Álıhan Smaıylov Belarýs Qazaqstan úshin mańyzdy saýda-ekonomıkalyq seriktes ekenin atap ótti. Ótken jyly ekijaqty taýar aınalymy 23%-ǵa ósip, $1 mlrd sheginen asty. Premer-Mınıstrdiń aıtýynsha, ósimniń joǵary serpinin saqtaý úshin jetkiziletin taýarlar men qyzmetterdiń aýqymyn keńeıtý boıynsha birlesken jumysty jalǵastyrý qajet.
Sonymen qatar eki el arasyndaǵy seriktestiktiń qozǵaýshy kúshiniń biri – ónerkásiptik kooperatsııa. Máselen, qazirdiń ózinde quny $180 mln-ǵa jýyq 8 joba júzege asyrylyp, sonyń negizinde 1400 jańa jumys orny ashyldy. Іske asyrý satysynda quny $19 mln-dy quraıtyn 2 joba bar. Bul rette Qazaqstan men Belarýs vedomstvolary 800-ge jýyq jumys ornyn qurý arqyly quny $100 mln-nan asatyn taǵy 4 jobany iske qosý boıynsha jumys júrgizip jatyr.
«Qazaqstan ındýstrııalyq yntymaqtastyqty damytýǵa, jańa birlesken jobalardy iske asyrýǵa jáne qoldanystaǵy óndiris oryndarynyń qýatyn keńeıtýge múddeli», — dedi Álıhan Smaıylov.
Óz kezeginde Belarýs Premer-Mınıstri Qazaqstan Respýblıkasy men Belarýs Respýblıkasynyń tabysty yntymaqtastyq jobalary osy baǵytty odan ári damytý úshin úlgi bola alatynyn atap ótti.
«Búginde birlesken óndiristik qýattar qazirdiń ózinde Qazaqstanda jylyna 10 myń traktor men 1 myńǵa deıin kombaın shyǵarýǵa múmkindik beredi. Biz bul jobalarǵa aldaǵy ýaqytta da qoldaý kútemiz», — dedi Roman Golovchenko.
Sonymen qatar ol agroónerkásiptik keshen, órt sóndirý-qutqarý tehnıkasyn óndirý jáne qurylys salasyndaǵy ózara is-qımyldy tereńdetý perspektıvalaryn atap kórsetti.
