Qazaqstan men Belarýs densaýlyq saqtaý salasyndaǵy strategııalyq áriptestikti nyǵaıtpaq
ASTANA. KAZINFORM — DSM basshysy Aqmaral Álnazarova Belarýs Respýblıkasynyń Tótenshe jáne Ókiletti elshisi Alekseı Bogdanovpen kezdesti, dep habarlaıdy Densaýlyq saqtaý mınıstrliginiń baspasóz qyzmeti.
Mınıstrlik málim etkendeı, taraptar áriptestiktiń strategııalyq sıpatyn rastap, joǵary medıtsınalyq tehnologııalar, farmatsevtıka, tsıfrlyq sheshimder jáne medıtsınalyq bilim berý salasyndaǵy ózara is-qımyldy talqylady.
Basymdyqtardyń qatarynda — jetekshi qazaqstandyq klınıkalardyń bazasynda medıtsınalyq týrızmdi, onyń ishinde: kardıohırýrgııa, transplantologııa jáne neırohırýrgııa baǵyttary boıynsha damytý bar.
Dárilik zattardy tirkeý jáne farmatsevtıkalyq ónimderdiń baǵasyn retteý máselelerine erekshe nazar aýdaryldy.
Baǵa belgileýdiń jáne halyqaralyq standarttardy qoldanýdyń ashyq tetikteriniń qajettiligi atap ótildi.
Sondaı-aq, eki eldiń beıindi oqý oryndarynyń bazasynda tájirıbe almasý, birlesken oqytý is-sharalaryn ótkizý jáne medıtsına kadrlaryn daıarlaý máseleleri qaraldy.
— Biz Belarýs Respýblıkasymen yntymaqtastyqqa úlken mán beremiz jáne medıtsınalyq kómektiń sapasyn odan ári arttyrý úshin bilim men ozyq tájirıbelermen almasýǵa daıynbyz, — dep atap ótti Álnazarova.
Kezdesý qorytyndysy boıynsha taraptar úkimetaralyq komıssııanyń ýaǵdalastyqtary sheńberinde birlesken jobalardy iske asyrýǵa, sondaı-aq TMD men ShYU-ny qosa alǵanda, halyqaralyq uıymdardyń alańdarynda ózara is-qımylǵa múddeliligin rastady.
Budan buryn Aqmaral Álnazarova MÁMS júıesiniń basty nátıjelerin ataǵan edi.
