Qazaqstan men Belarýs áskerı tehnıkany jasaýda ǵylymı zertteýler júrgizedi

ASTANA. QazAqparat - Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Qazaqstan Úkimeti men Belarýs Úkimeti arasyndaǵy ónerkásiptiń qorǵanys salalary uıymdarynyń óndiristik jáne ǵylymı-tehnıkalyq kooperatsııasy týraly kelisimdi ratıfıkatsııalaý týraly» zań jobasy qaraldy, dep habarlaıdy QazAqparat tilshisi.

«Osy kelisim eki eldiń qorǵanys ónerkásibi salasyndaǵy kásiporyndardyń ózara yntymaqtastyǵy úshin qolaıly jaǵdaılar jasaýdy kózdeıdi. Birinshi kezekte áskerı-tehnıkalyq maqsattarda jetkiziletin ónimder men kórsetiletin qyzmetter lıtsenzııalaýdan bosatylady. Bul olardyń jetkizý merzimin edáýir qysqartady», - dedi QR Qorǵanys jáne aeroǵarysh ónerkásibi vıtse-mınıstri Amanııaz Erjanov.

Kelisim aıasynda Qazaqstan úshin birqatar paıdaly qadamdar iske asyrylmaq. Birinshiden, áskerı maqsattaǵy ónimderdi jetildirýge járdemdesetin jıyntyqtaýysh materıaldardy ózara jetkizý arqyly áskerı ónimniń óndirisin arttyrýǵa yqpal etedi. Ekishiden, qorǵanys ónerkásibi kásiporyndar ózara tájirıbe almasa alady jáne osy salada óte paıdaly ári tıimdi tájirıbeni qoldanýyna múmikindik týady.

Úshinshiden, qarý-jaraq pen áskerı tehnıkanyń jańa túrin jasaý, sondaı-aq qolda bar tehnıkany jańartý maqsatynda birlesken ǵylymı zertteýler júrgize alady.

«Kelisimdi ratıfıkatsııalaý bıýdjetten qosymsha shyǵyndardy talap etpeıdi jáne teris áleýmettik saldarǵa ákelip soqpaıdy», - dedi A. Erjanov.

Belgili bolǵandaı, elimiz memlekettik qorǵanys tapsyrysy aıasynda Belarýsten tikeleı áskerı tehnıka satyp alyp jatqan joq. Alaıda brondy tehnıkany, avıatsııalyq tehnıkany jóndeý sharalary eskerilgen. Qazaqstan óz kezeginde zeńbirek pen oǵan baılanysty ónimder jetkizedi.