Qazaqstan men Belarýs áskerı-tehnıkalyq yntymaqtastyqta birlesken jobany iske asyrady

NUR-SULTAN. QazAqparat – Belarýs delegatsııasymen kelissózder barysynda óndiristik baılanystardy kúsheıtýge basa nazar aýdaryldy. Bul týraly búgin Aqordada Belarýs Prezıdenti Aleksandr Lýkashenkomen kelissózderden keıingi birlesken málimdeme barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Qazirgi ýaqytta Qazaqstanda Belarýs kapıtalynyń qatysýymen 340-qa jýyq kásiporyn jumys isteıdi. Osy rette segiz birlesken kásiporyn iri ónerkásip jáne aýyl sharýashylyǵy tehnıkasyn shyǵarýmen aınalysady. Biz osy kompanııalardyń tıimdi jumys isteýine qatysty máselelerdi jan-jaqty talqyladyq», - dedi Qazaqstan Prezıdenti

Memleket basshysynyń sózine qaraǵanda, aýyl sharýashylyǵy jáne áskerı-tehnıkalyq yntymaqtastyq salalary boıynsha qosymsha birlesken eki-úsh jobany júzege asyrý múmkindigin qarastyrý jóninde kelisimge qol jetkizildi.

«Keshe Nur-Sultan qalasynda ótken qazaq-belarýs bıznes-forýmy iskerlik baılanystardy ilgeriletýge tyń serpin berdi. Forýmnyń qorytyndysy boıynsha 11 kelisimshartqa qol qoıyldy», - dedi Qasym-Jomart Toqaev.