Qazaqstan men Belarýs arasyndaǵy parlamentaralyq yntymaqtastyqty odan ári tereńdetý máselesi talqylandy
ASTANA. QazAqparat - Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Belarýs Ulttyq Jınalysy Ókilder palatasynyń Tóraǵasy Vladımır Andreıchenkomen kezdesti.
Q.Toqaevtyń pikirinshe, Belarýs parlamentshileriniń sapary eki el arasyndaǵy odaqtastyq qarym-qatynastardy odan ári damytýǵa yqpal etedi. Senat Tóraǵasy Qazaqstan halqy Assambleıasynyń 20 jyldyǵyna arnalǵan halyqaralyq konferentsııaǵa qatysqany, forýmda Qazaqstanǵa jáne Memleket basshysy Nursultan Nazarbaevtyń atyna bildirgen ystyq yqylasy úshin belarýstik áriptesine rızashylyq bildirdi. Senat Tóraǵasy Elbasy usynǵan bes ınstıtýttyq reformalar negizinde Qazaqstan irgeli ózgerister qarsańynda turǵanyn atap ótti.
Q.Toqaev Qazaqstan men Belarýs parlamentshileri ekijaqty deńgeıde ǵana emes, sondaı-aq TMD, UQShU jáne basqa da uıymdardyń parlamentaralyq assambleıalary aıasynda jemisti is-qımyl júzege asyp kele jatqanyn yqylaspen atap ótti. Sondaı-aq, Eýrazııalyq ekonomıkalyq komıssııanyń qyzmeti de depýtattar tarapynan tıisti qoldaýdy talap etedi. Óz kezeginde, V.Andreıchenko Belarýs Qazaqstannyń jetistikterin joǵary baǵalaıtynyn jáne elimizdiń halyqaralyq arenadaǵy bedeli arta túskenine qýanyshty ekenin atap ótti. Mártebeli meıman parlamentaralyq yntymaqtastyqty odan ári tereńdetý, sondaı-aq eki eldiń óńirleri arasyndaǵy baılanystardy óristetý týraly oılaryn ortaǵa saldy. Osyǵan baılanysty, Belarýs Parlamentiniń Ókilder palatasynyń tóraǵasy jergilikti ózin-ózi basqarý men jergilikti jerlerdegi ókildi jáne atqarýshy organdar qyzmetiniń tıimdiligin arttyrýǵa baǵyttalǵan Belarýs reformalary týraly áńgimeledi.
