Qazaqstan men Belarýs akademııalyq baılanystardy keńeıtedi
ASTANA. KAZINFORM – QR Ǵylym jáne joǵary bilim mınıstrliginde mınıstr Saıasat Nurbektiń Belarýs Respýblıkasynyń QR Tótenshe jáne Ókiletti elshisi Alekseı Bogdanovpen kezdesýi ótti. Bul týraly Ǵylym jáne joǵary bilim mınıstrliginiń baspasóz qyzmeti habarlady.
Kezdesýde joǵary bilim jáne ǵylym salasyndaǵy ekijaqty yntymaqtastyqty damytý baǵyttary, sondaı-aq ony iske asyrýdyń naqty tetikteri jan-jaqty talqylandy.
Kelissózder qorytyndysy boıynsha taraptar birqatar birlesken is-sharany ótkizýge daıyn ekenin rastady. Atap aıtqanda, elimizde Qazaqstan men Belarýs joǵary oqý oryndarynyń Ǵylymı-bilim berý konsortsıýmynyń 10-otyrysyn, sondaı-aq eki eldiń joǵary oqý oryndary rektorlarynyń forýmyn ótkizý týraly kelisimge qol jetkizildi. Atalǵan is-sharalar akademııalyq baılanystardy nyǵaıtýǵa jáne joǵary bilim berý uıymdary arasyndaǵy yntymaqtastyqty keńeıtýge yqpal etedi.
Sonymen qatar Belarýs Respýblıkasynda ótetin Shanhaı yntymaqtastyq uıymyna múshe memleketterdiń bilim mınıstrleriniń 10-keńesi aıasynda eki eldiń jetekshi joǵary oqý oryndarynyń qatysýymen dóńgelek ústel uıymdastyrý máselesin pysyqtaý týraly ýaǵdalastyqqa qol jetkizildi.
Basqosý barysynda qazaqstandyq joǵary bilimdi shetelde ilgeriletý máselesine erekshe nazar aýdaryldy. Osyǵan baılanysty taraptar Belarýs Respýblıkasynda «Study in Kazakhstan» bilim berý kórmesin uıymdastyrýǵa daıyn ekenin bildirdi.
Mınıstr Saıasat Nurbek Qazaqstan men Belarýs arasyndaǵy yntymaqtastyqty damytýǵa erekshe mán beriletinin atap ótip, birlesken bastamalardy iske asyrýǵa jan-jaqty qoldaý kórsetiletinin jetkizdi.
Budan buryn habarlaǵanymyzdaı, Qazaqstan men Belarýs ónerkásiptik qaýipsizdik salasyndaǵy yntymaqtastyqty nyǵaıtpaq.
