Qazaqstan men Belarýs 2027 jyly elektrondyq ruqsattardy qoldaný boıynsha pılottyq jobany iske asyrady
ASTANA. KAZINFORM- Qazaqstan men Belarýs 2027 jyly halyqaralyq avtomobıl tasymalynda elektrondyq ruqsattardy paıdalaný boıynsha pılottyq jobany iske asyrýǵa kelisti. Sondaı-aq taraptar 2026 jyldyń sońyna deıin osy baǵytta jumys tobyn qurýdy, 2026 jylǵa qosymsha 5 myń ruqsat blankisimen almasýdy jáne 2027 jylǵa arnalǵan ruqsattardyń aldyn ala kvotasyn 50 myń birlik kóleminde belgileýdi maquldady.
Bul máseleler Astanada ótken Qazaqstan-Belarýs halyqaralyq avtomobıl qatynasy jónindegi birlesken komıssııanyń kezekti otyrysynda talqylandy. Kezdesýde ekijaqty jáne tranzıttik júk tasymalynyń ózekti máseleleri, sondaı-aq ruqsat berý júıesin tsıfrlandyrýdyń aldaǵy qadamdary qaraldy, dep habarlaıdy QR Kólik mnıstrliginiń baspasóz qyzmeti.
Halyqaralyq avtomobıl tasymalyna elektrondyq ruqsattardy engizýge erekshe nazar aýdaryldy. Taraptar 2026 jyldyń sońyna deıin osy baǵytta jumys tobyn qurýǵa, al 2027 jyly elektrondyq ruqsattardy paıdalaný boıynsha pılottyq jobany iske asyrýǵa kelisti. Elektrondyq formatqa kóshý ákimshilik rásimderdi qysqartýǵa, tasymaldardyń ashyqtyǵyn arttyrýǵa jáne qujattardy rásimdeý protsesin jedeldetýge múmkindik beredi.
Sonymen qatar halyqaralyq avtomobıl tasymalyna ruqsattar berýdiń shekteýsiz kvotasyn engizý múmkindigi qaraldy.
-Tasymaldaýshylardyń qajettiligin qamtamasyz etý maqsatynda 2026 jylǵa qosymsha 5 myń ruqsat blankisimen ózara almasý týraly sheshim qabyldandy. Al 2027 jylǵa arnalǵan ruqsattardyń aldyn ala kvotasy 50 myń birlik kóleminde kelisildi. Bul halyqaralyq tasymaldardy júzege asyrýǵa qosymsha múmkindik berip, eki el arasyndaǵy saýda-ekonomıkalyq baılanystardyń damýyna yqpal etedi,-delingen habarlamada.
Otyrys barysynda Qazaqstan men Belarýs arasyndaǵy júk tasymaly kóleminiń turaqty ósip kele jatqany jáne eki eldiń halyqaralyq kólik dálizderin damytýdaǵy mańyzy atap ótildi.
Kezdesý qorytyndysy boıynsha taraptar avtomobıl kóligi salasyndaǵy yntymaqtastyqty odan ári nyǵaıtýǵa, halyqaralyq tasymaldarǵa qolaıly jaǵdaı jasaýǵa jáne ekijaqty kólik baılanystaryn damytýǵa múddeli ekenin rastady.
Aıta keteıik, osyǵan deıin Qazaqstannyń Ortalyq Azııada avıatsııalyq qaýipsizdik boıynsha kósh bastap turǵany týraly jazdyq.
