Qazaqstan men Belgııa vaktsınatsııa pasporttaryn ózara taný týraly kelisti

BRıÝSSELЬ. QazAqparat – Qazaqstan Respýblıkasynyń Bas memlekettik sanıtarlyq dárigeri el aýmaǵynda Belgııa Koroldiginde berilgen COVID-19 vaktsınatsııasynyń pasporttaryn/sertıfıkattaryn/anyqtamalaryn jaramdy dep taný týraly sheshim qabyldady, dep habarlaıdy QazAqparat menshikti tilshisi.

Óz kezeginde Belgııa KVI-ge qarsy vaktsınatsııa týraly Qazaqstan sertıfıkattaryn (Comirnaty (Pfizer-BioNTech), Sinopharm jáne CoronaVac (Sinovac) da moıyndady.

Qazir Belgııada Eýropalyq dári-dármek agenttigi nemese Dúnıejúzilik densaýlyq saqtaý uıymy maquldaǵan vaktsınalar (Moderna, Comirnaty (Pfizer-BioNTech), Janssen (Johnson&Johnson), AstraZeneca, Sinopharm, CoronaVac (Sinovac), Bharat Biotech (Covaxin), Covishield, Covovax, Nuvaxovid (Novavax) tanylýda.

Budan bylaı Qazaqstan Respýblıkasy men Belgııa Koroldiginiń vaktsınalaý pasporttarynyń ıeleri vızalyq rejımdi saqtaı otyryp, shekteý sharalarynsyz (PTR-test jáne karantın) Belgııa men Qazaqstanǵa erkin saıahattaı alady.

«Bul QR men EO arasynda erkin júrip-turý úshin shekteý sharalaryn alyp tastaýǵa qatysty taǵy bir mańyzdy qadam», - dep atap ótti Qazaqstannyń Belgııadaǵy elshiliginde.

Budan basqa, QR-da Argentına, Belız, Bolıvııa, Brazılııa, Ulybrıtanııa, Vengrııa, Grýzııa, Indonezııa, Iran, Iordanııa, Ispanııa, Kanada, Qyrǵyzstan, Maldıv, Mońǵolııa, Armenııa, Belarýs, Moldova, Perý, San-Marıno, Serbııa, Týnıs, Úndistan, Fılıppın, QHR Gonkong arnaıy ákimshilik aýdany, Taıland, Túrkııa, Ózbekstan, Chernogorııa, Chehııa, Shrı-Lanka, Ekvador, Estonııa jáne Japonııa elderiniń KVI-ge qarsy pasport/sertıfıkat/anyqtamalary jaramdy dep tanylǵan.