Qazaqstan men Bavarııanyń ózara saýda kólemi 3,4 mlrd eýroǵa jetti

ASTANA. KAZINFORM - Qazaqstan Respýblıkasy Premer-mınıstriniń birinshi orynbasary Roman Sklıar Bavarııa federaldy jeriniń halyqaralyq yntymaqtastyq jáne Eýropa isteri jónindegi memlekettik mınıstri Erık Baısvenger bastaǵan nemis delegatsııasyn qabyldady.

QR Úkimti bapasóz qyzmetiniń habarlaýynsha, kezdesý barysynda taraptar ónerkásip, aýyl sharýashylyǵy, tehnologııa jáne shıkizat salalaryndaǵy ekijaqty yntymaqtastyqty damytýǵa qatysty ózekti máselelerdi talqylady. Sondaı-aq Roman Sklıardyń 2025 jylǵy sáýirde Mıýnhen qalasyna jasaǵan sapary aıasynda qol jetkizilgen kelisimderdiń júzege asyrylý barysy qaraldy. 

Ótken jylǵy sapardyń naqty nátıjeleriniń biri retinde osy kúni erterek Qazaqstan Respýblıkasy Úkimeti men Bavarııa federaldy jeriniń Úkimeti arasynda Ózara túsinistik týraly memorandýmǵa qol qoıyldy.

Roman Sklıar atap ótkendeı, bul qujat saýda-ekonomıkalyq jáne ınvestıtsııalyq yntymaqtastyqty odan ári tereńdetýge, sondaı-aq qosylǵan quny joǵary birlesken jobalardy iske qosýǵa berik ınstıtýtsıonaldyq negiz qalaıdy.

Óz kezeginde Erık Baısvenger bizdiń elmen ózara is- qımyldyń joǵary qarqynyn atap ótip, Bavarııa Qazaqstandy Ortalyq Azııadaǵy senimdi uzaq merzimdi seriktes retinde qarastyratynyn jetkizdi.

Sonymen qatar, ol Memorandým erejelerin iske asyrý iskerlik baılanystardy jandandyryp, ónerkásiptik kooperatsııany keńeıtip, ekijaqty yntymaqtastyqty sapaly jańa deńgeıge kóteretinine senim bildirdi.

Bavarııa – Germanııa Federatıvtik Respýblıkasynyń jetekshi ekonomıkalarynyń biri. Qazirgi ýaqytta ol Qazaqstanmen taýar aınalymy kólemi boıynsha Germanııanyń federaldyq jerleri arasynda birinshi orynda tur.

Germanııa tarapynyń derekterine sáıkes, 2025 jyly ózara saýda kólemi 3,4 mlrd eýrony qurady.

Osylaısha, Qazaqstan Bavarııa úshin tek Ortalyq Azııada ǵana emes, tutastaı TMD boıynsha da negizgi saýda-ekonomıkalyq áriptes bolyp qalyp otyr.

Osyǵan deıin Qazaqstan men Ózbekstan yqpaldastyǵy artyp kele jatqany týraly jazdyq.