Qazaqstan men Bahreın arasyndaǵy týrızm salasyndaǵy yntymaqtastyq nyǵaıtylmaq
Darıǵa Nazarbaeva Qazaqstan Bahreındi dos jáne mańyzdy áriptes retinde qarastyrady jáne Koroldikpen ekijaqty yntymaqtastyqty damytýǵa basymdyq beretinin atap ótti.
«Sizdiń saparyńyz parlamentaralyq baılanystardy damytýǵa úles qosady dep úmit artamyn. Parlamenttik dıplomatııaǵa senim zor», - dedi D.Nazarbaeva.
Faýzııa Abdýlla ıÝsýf Zeınal Senat basshysynyń sózine qoldaý bildirdi jáne Qazaqstan men Bahreınniń terrorızmmen kúres jáne janjaldardy beıbit únqatysý arqyly sheshý sııaqty asa mańyzdy baǵyttar boıynsha ustanymdary óte jaqyn ekenin atap ótti. Ol sondaı-aq Qazaqstan men Bahreın arasyndaǵy tikeleı áýe qatynasy men vızasyz tártip máselesin sheshýge úmittenetinin jetkizdi.
Darıǵa Nazarbaeva óz kezeginde osy baǵyttaǵy jumysty odan ári jalǵastyrý úshin eki eldiń týrıstik agenttikteri qyzmetin úılestirýdi usyndy. Senat basshysy Qazaqstanda kóptegen tarıhı jáne kórkem jerler bar ekenin jáne týrıstik ınfraqurylym damyp kele jatqanyn aıta kelip, bizdiń elimizdiń týrızm áleýetine erekshe toqtaldy.
Faýzııa Abdýlla ıÝsýf Zeınal bizdiń elimizdiń ádemiligi men ereksheligin aıta kelip, eń basty sulýlyq – osynda turatyn adamdar ekenin atap ótti.
Bahreın Koroldigi Ulttyq Jınalysynyń Depýtattar palatasynyń Tóraǵasy qysqa merzim ishinde salynǵan jáne ınfraqurylymy damyǵan qazirgi zamanǵy tolyqqandy qalaǵa aınalǵan astananyń kelbetine tańdanysyn bildirdi.
«Sizderdiń Tuńǵysh Prezıdentińiz shyn máninde kóregen jáne batyl tulǵa ekenin atap ótkim keledi, sebebi bul onyń armany edi, qaısarlyǵy men kúsh-jigeriniń arqasynda osy armandy júzege asyrdy. Sizdiń halqyńyz – erkin ómir súrýdi ańsaıtyn halyq. Bul ishki deńgeıdegi qana emes, álemdik arenadaǵy teńdesi joq jeńis», - dedi ol.
