Qazaqstan men BAÁ júrgizýshi kýálikterin ózara taný jóninde kelisimge keldi
ASTANA.KAZINFORM - arab tarapynyń shaqyrýymen Qazaqstan Іshki ister mınıstri Birikken Arab Ámirlikterine (Abý-Dabı qalasy) jumys saparymen bardy, - dep jazdy Polisia.kz.
Sapar aıasynda Qazaqstannyń Іshki ister mınıstri Erjan Sadenovtiń Birikken Arab Ámirlikteri premer-mınıstriniń orynbasary ári Іshki ister mınıstri Sheıh Saıf ben Zaıd Ál Nahaıanmen kelissózderi ótti.
Taraptar qylmysqa qarsy kúres salasyndaǵy ekijaqty yntymaqtastyqty odan ári damytý máselesin talqylady. Atap aıtqanda, uıymdasqan transulttyq qylmysqa, kıberqylmysqa jáne esirtkiniń zańsyz aınalymyna qarsy is-qımyl, qylmyskerlerdi izdestirý, jedel aqparat almasý, zamanaýı tehnologııalardy engizý jáne kadrlardy daıarlaý máseleleri qarastyryldy.
Kelissózderdiń basty nátıjesi retinde Qazaqstan Іshki ister mınıstrligi men Birikken Arab Ámirlikteri Іshki ister mınıstrligi arasynda júrgizýshi kýálikterin ózara taný týraly memorandýmǵa qol qoıyldy. Qujatqa qol qoıý eki el azamattary úshin ákimshilik rásimderdi jeńildetýge jáne qosymsha qolaıly jaǵdaılar jasaýǵa baǵyttalǵan. Jyl saıyn Birikken Arab Ámirlikterine shamamen 400 myń Qazaqstan azamaty barady. Sonymen qatar BAÁ aýmaǵynda 14 myńǵa jýyq qazaqstandyq azamat turaqty túrde turady.
Qol qoıylǵan memorandým olarǵa júrgizýshi kýálikterin paıdalaný kezinde jeńildikter ákelmek. Memorandým ulttyq júrgizýshi kýálikterin ózara tanýdy, sondaı-aq qujatta kózdelgen jaǵdaılarda olardy jeńildetilgen tártippen aıyrbastaýdy qarastyrady. Memorandým taraptar qajetti ishki memlekettik rásimderdi aıaqtaǵannan keıin kúshine enedi.
Sapar barysynda qazaqstandyq delegatsııa BAÁ-niń daǵdarystyq jaǵdaılar jónindegi ulttyq agenttiginiń qyzmetimen tanysty. Sondaı-aq Іshki ister mınıstri Erjan Sadenov EDGE Group tehnologııalyq konglomeratynyń basshylyǵymen kezdesý ótkizdi. Kezdesý barysynda jasandy ıntellekt, kıberqaýipsizdik, arnaıy tehnıka men qarý-jaraq salalaryndaǵy ozyq ázirlemeler, sondaı-aq quqyq qorǵaý qyzmetine arnalǵan zamanaýı tehnologııalyq sheshimder tanystyryldy.
Іshki ister mınıstrliginiń málimetinshe, qol jetkizilgen kelisimder Qazaqstan men Birikken Arab Ámirlikteri arasyndaǵy yntymaqtastyqty odan ári nyǵaıtýǵa jáne basqa da kóptegen baǵyt boıynsha ózara is-qımyldy keńeıtýge yqpal etedi.
Qymyz ishken adam da mas bolyp, júrgizýshi kýáliginen aıyrylady. Alkotesterde promılle normadan joǵary bolsa, mamandar qorytyndyda «masań kúıde» dep jazyp beredi. Jazasy — 7 jylǵa deıingi merzimge júrgizýshi kýáliginen aıyrý. Alkotester tapsyrýdan bas tartsa — 8 jyl. Qymyz ishken adam shynymen mas bola ma? Kazinform tilshisi sala mamandarymen sóılesti.
