Qazaqstan men BAÁ xımııa salasynda birlesken jobalardy qolǵa almaq

ASTANA. QazAqparat - Astanada "Birikken xımııalyq kompanııa" JShS men Birikken Arab Ámirlikteriniń "Mubadala" ınvestıtsııalyq kompanııasy arasyndaǵy yntymaqtastyq týraly memorandýmǵa qol qoıyldy, dep xabarlaıdy QazAqparat.

Oǵan sáıkes, texnıkalyq jáne ekonomıkalyq kórsetkishteri eki tarapqa da tıimdi bolatyn jobanyń modelin ázirleý kózdelgen.

"Biz bul kelissózderdi birneshe márte ótkizdik. Venada Mubadala kompanııasynyń munaı-xımııa bólimsheleriniń birinde kezdesý ótti. ıAǵnı, bul jan-jaqty saralanǵan kelisim. Bastysy, saıası sheshim jasalǵany asa mańyzdy bolyp otyr. Saıası sheshim Memleket basshylarynyń deńgeıinde qabyldandy. Prezıdenttiń BAÁ-ge sapary aıasynda osy másele talqyǵa salyndy. Sol kezden bastap máseleni egjeı-tegjeıli pysyqtaýdan ótkizdik. Birneshe aıdan soń naqty jobalarǵa qatysty kelisimderge qol qoıylady dep úmittenemiz", - dedi QR Energetıka vıtse-mınıstri Maǵzum Myrzaǵalıev tilshilerge bergen suxbatynda.

Eske salsaq, bıyl 14-16 qańtarynda QR Prezıdenti N. Nazarbaevtyń BAÁ-ge resmı sapary oryn alǵan bolatyn. Memleket basshylary qol jetkizgen kelisimderiniń nátıjesinde eki eldiń úkimetteri arasynda munaı-gaz jáne xımııa salalarynda yntymaqtastyq boıynsha kelissózder júrgizile bastady. Sonymen qatar 19 naýryzda Qazaqstan Premer-Mınıstriniń birinshi orynbasary Asqar Mamın Ábý-Dabı qalasynda BAÁ-niń vıtse-premeri sheıx Mansýr ben Zaıd Ál Naxaıanmen kezdesti. QR Energetıka mınıstri Qanat Bozymbaev jáne BAÁ-niń Energetıka mınıstri Sýxeılo Muxamed Ál-Mazrýı birqatar kelissózder ótkizgen.

Qazaqstanda polıetılen óndirý jobasyn birlesip iske asyrý múmkindigin zerdeleý boıynsha kelisim atalǵan jumystardyń nátıjesi.