Qazaqstan men BAÁ strategııalyq seriktestikti jańa jobalarmen nyǵaıtpaq
ASTANA. KAZINFORM – Qazaqstannyń BAÁ-degi Elshisi Raýan Jumabek Adjman ámirliginiń basshylyǵymen jáne iskerlik qaýymdastyq ókilderimen birqatar kezdesýler ótkizdi, dep habarlaıdy QR Syrtqy ister mınıstrliginiń baspasóz qyzmeti.
Adjman Ámirliginiń Taq murageri sheıh Ammar ben Hýmeıd Ál Nýeımımen ótken kezdesýde Qazaqstanda júzege asyrylyp jatqan aýqymdy saıası jáne áleýmettik-ekonomıkalyq reformalar, sondaı-aq eldegi saılaý úderisi men Ulttyq quryltaı týraly aqparat usynyldy.
Taraptar eki el arasyndaǵy yntymaqtastyqtyń qazirgi jaı-kúıi men qatynastardy odan ári nyǵaıtýdyń perspektıvalaryn talqylap, Adjman ámirligimen saýda-ekonomıka, ınvestıtsııa jáne týrızm salalaryndaǵy ózara is-qımyldy damytýǵa erekshe nazar aýdardy.
Kezdesý qorytyndysy boıynsha Qazaqstan men Adjman ámirliginiń iskerlik qaýymdastyqtary arasyndaǵy baılanystardy qoldaý jáne damytý, birlesken ınvestıtsııalyq bastamalardy iske asyrýǵa járdemdesý, sondaı-aq saýda-ekonomıkalyq yntymaqtastyqty keńeıtý jóninde ýaǵdalastyqqa qol jetkizildi.
Adjman ámirliginiń Erkin ekonomıkalyq aımaqtar basqarmasynyń bas dırektory Obeıd ál-Matrýshımen ótken kelissózder barysynda ınvestıtsııalyq yntymaqtastyqty keńeıtý, birlesken jobalardy iske asyrý úshin qolaıly jaǵdaılar jasaý, sondaı-aq erkin ekonomıkalyq aımaqtardy damytý salasynda tájirıbe almasý máseleleri qarastyryldy. Ámirlik tarapy yntymaqtastyqty odan ári damytýǵa, onyń ishinde Adjman erkin ekonomıkalyq aımaǵynyń múmkindikterin tanystyrý jáne Qazaqstannyń bıznes-qoǵamdastyǵymen tikeleı baılanystar ornatý maqsatynda elimizdiń aýmaǵynda ınvestıtsııalyq roýd-shoýlar ótkizýge qyzyǵýshylyq bildirdi.
Thumbay Group kompanııasynyń prezıdenti Týmbaı Moıdınmen ótken kezdesýde densaýlyq saqtaý, medıtsınalyq bilim berý, ınvestıtsııa jáne ózara qyzyǵýshylyq týdyratyn birlesken jobalardy iske asyrý baǵytyndaǵy yntymaqtastyq perspektıvalary talqylandy.
Kezdesý nátıjesinde densaýlyq saqtaý salasyndaǵy birlesken jobalardy iske asyrý múmkindikterin qarastyrýdy, medıtsınalyq ınfraqurylymdy damytý, kadrlar daıarlaý jáne tájirıbe almasýdy qosa alǵanda, ózara is-qımyldy jalǵastyrý týraly ýaǵdalastyqqa qol jetkizildi. Taraptar yntymaqtastyqty keńeıtýge jáne salalyq uıymdar arasynda tikeleı baılanystar ornatýǵa ózara qyzyǵýshylyq bildirdi.
Atalǵan kezdesýler taraptardyń Qazaqstan Respýblıkasy men Birikken Arab Ámirlikteri arasyndaǵy strategııalyq seriktestikti nyǵaıtýǵa baǵyttalǵan ekijaqty yntymaqtastyqty odan ári keńeıtýge jáne jańa birlesken bastamalardy iske asyrýǵa ózara múddeliligin rastady.
Osyǵan deıin BAÁ kompanııasy Qazaqstanda «aqyldy» joldar salýǵa nıetti ekeni týraly jazdyq.
