Qazaqstan men BAÁ strategııalyq saýda-ınvestıtsııalyq seriktestikti nyǵaıtady
ASTANA. KAZINFORM — Saýda jáne ıntegratsııa mınıstri Arman Shaqqalıev Joǵary Eýrazııalyq ekonomıkalyq keńes pen Eýrazııalyq ekonomıkalyq forým otyrystaryna qatysý úshin resmı delegatsııany bastap kelgen Birikken Arab Ámirlikteriniń Syrtqy saýda mınıstri doktor Tanı ben Ahmed Ál Zeıýdımen kezdesti.
Kezdesý barysynda taraptar saýda-ekonomıkalyq jáne ınvestıtsııalyq yntymaqtastyqty odan ári damytý perspektıvalaryn, sondaı-aq ekijaqty kelisimder men Qazaqstan men BAÁ arasyndaǵy iskerlik baılanysty keńeıtýge baǵyttalǵan birlesken bastamalardy talqylady.
Taraptar eki el arasyndaǵy seriktestiktiń turaqty túrde damyp kele jatqanyn atap ótti. Ózara saýda kólemi artyp, ınvestıtsııalyq baılanystar nyǵaıyp, ekonomıkanyń strategııalyq mańyzdy salalaryndaǵy birlesken jobalar sany kóbeıip keledi.
Kelissózder barysynda logıstıka, saýda, agroónerkásip kesheni, qarjy ınfraqurylymy jáne zamanaýı tehnologııalar salalaryndaǵy ınvestıtsııalyq jobalardy júzege asyrý máselelerine erekshe nazar aýdaryldy. Birikken Arab Ámirlikteri Qazaqstannyń Taıaý Shyǵystaǵy negizgi ekonomıkalyq seriktesteriniń biri ekeni aıtyldy.
— Sondaı-aq taraptar 2025 jyldyń qorytyndysy boıynsha BAÁ Qazaqstan ekonomıkasyna 1,6 mlrd AQSh dollary kóleminde tikeleı sheteldik ınvestıtsııa quıyp, eldiń eń iri tórt ınvestorynyń qataryna engenin atap ótti. Ámirlik ınvestıtsııalarynyń basym bóligi kólik-logıstıka ınfraqurylymyn damytýǵa, saýdaǵa, qalalyq ortany jetildirýge jáne ózge de jobalarǵa baǵyttalǵan. Sonymen qatar, eki el arasyndaǵy taýar aınalymy bir jyl ishinde 5 paıyzǵa ósken, — delingen Saýda jáne ıntegratsııa mınıstrligi taratqan aqparatta.
2026 jyldyń qańtar–naýryz aılarynyń qorytyndysy boıynsha Qazaqstan men BAÁ arasyndaǵy taýar aınalymy 45,8 mln AQSh dollaryn qurady. Bul rette Qazaqstannyń BAÁ-ge eksporty 42,1 paıyzǵa artty.
Qazaqstan tarapy Alatau City jobasynyń ınvestıtsııalyq áleýetin tanystyryp, onyń óńirdegi ekonomıkalyq ósimniń, ınnovatsııa men halyqaralyq bıznesti tartýdyń keleshegi zor ortalyqtarynyń biri ekenin atap ótti.
Kezdesý barysynda agroónerkásip salasyndaǵy yntymaqtastyq múmkindikteri de qaraldy. Atap aıtqanda, azyq-túlik ınfraqurylymyn damytý, aýyl sharýashylyǵy ónimderin óńdeý jáne azyq-túlik qaýipsizdigi baǵytynda zamanaýı tehnologııalardy engizý máseleleri sóz boldy.
Taraptar «Qazaqstannyń eksporttyq-kredıttik agenttigi» AQ men BAÁ qarjy ınstıtýttary arasyndaǵy ózara is-qımylǵa da toqtaldy. Onyń ishinde ıslamdyq qarjylandyrý, ınvestıtsııalyq jobalardy súıemeldeý, eksporttyq, qarjylyq jáne saýda salalaryn retteý boıynsha tájirıbe almasý máseleleri talqylandy.
Óz kezeginde, Ámirlik tarapy mıkrokarjylandyrý, saqtandyrý jáne ınvestıtsııalyq qorjyn qalyptastyrý salalaryndaǵy birlesken bastamalardy damytýǵa qyzyǵýshylyq tanytty. Sondaı-aq Qazaqstandaǵy ınvestıtsııalyq qatysý aıasyn keńeıtýge, onyń ishinde shaǵyn jáne orta bıznesti qoldaý tetikteri men zamanaýı qarjy quraldaryn engizýge daıyn ekenderin bildirdi.
Kezdesý qorytyndysy boıynsha taraptar strategııalyq seriktestikti odan ári tereńdetýge, saýda-ekonomıkalyq baılanystardy keńeıtýge jáne Qazaqstan men Birikken Arab Ámirlikteri arasyndaǵy jańa birlesken ınvestıtsııalyq jobalardy júzege asyrýǵa ózara múddeli ekenin rastady.
Budan buryn Arman Shaqqalıev ishki naryqty qoldaý úshin qabyldanǵan sharalardy atady.
