Qazaqstan men BAÁ energetıka salasyndaǵy strategııalyq seriktestik mártebesin rastady
VENA. KAZINFORM – 10 shilde 2025 jyl – OPEK halyqaralyq semınary aıasynda QR Energetıka mınıstri Erlan Aqkenjanov pen BAÁ Energetıka jáne ınfraqurylym mınıstri Sýheıl ál-Mazrýı kezdesti.
Qos tarap yntymaqtastyqtyń serpindi damýyn joǵary baǵalap, ony áriptestiktiń jarqyn úlgisi dep atady.
Kelissózde BAÁ-niń jetekshi kompanııasy Masdar-dyń qatysýymen júzege asyrylyp jatqan Jambyl oblysyndaǵy qýattylyǵy 1 GVt bolatyn jel elektr stantsııasy qurylysy talqylandy.
Erlan Aqkenjanov bul strategııalyq jobany Qazaqstan bıligi jan-jaqty qoldaıtyndyǵyn jetkizdi. Jobaǵa buryn-sońdy bolmaǵan basymdyqtar berilgenin aıtyp, úkimetaralyq kelisimniń óte qysqa merzimde bekitilgenin tilge tıek etti. Bul – Qazaqstan tarapynyń óz mindettemelerine adaldyǵyn kórsetedi.
Sýheıl ál-Mazrýı óz kezeginde jasalǵan qolaıly jaǵdaıǵa alǵysyn bildirip, Masdar kompanııasy jobany josparǵa saı júzege asyratynyn jetkizdi.
– BAÁ, sonyń ishinde Masdar kompanııasymen áriptestigimiz – ortaq senim men tabystyń jarqyn úlgisi. Bul joba óńirdegi jańartylatyn energııa kózderi (JEK) salasyndaǵy eń iri bastama jáne «jasyl» energetıka salasyndaǵy yntymaqtastyqty odan ári arttyrýǵa negiz bolady. Biz BAÁ ekonomıkamyzdy dekarbonızatsııalaý maqsattaryna jetýdegi negizgi strategııalyq seriktesimiz dep sanaımyz, - dedi Erlan Aqkenjanov.
Buǵan deıin Úkimette energetıkalyq, aqparattyq-kommýnıkatsııalyq jobalardyń júzege asyrylý barysy qaralǵanyn jazǵan edik.