Qazaqstan men BAÁ Cyrtqy ister mınıstrleri óńirdegi jaǵdaıdy talqylady
ASTANA. KAZINFORM – Qazaqstan Syrtqy ister mınıstri Ermek Kósherbaev Birikken Arab Ámirlikteri Premer-mınıstriniń orynbasary – Syrtqy ister mınıstri sheıh Abdalla ben Zaıd Ál Nahaıanmen telefon arqyly sóılesti.
Suhbat barysynda taraptar Taıaý Shyǵystaǵy qazirgi ahýaldy talqylap, óńirdegi shıelenis tóńireginde pikir almasty.
E.Kósherbaev Qazaqstan Prezıdenti Qasym-Jomart Toqaev buryn bildirgen ustanymdy rastady jáne óńirdegi eskalatsııanyń jalǵasýyna, onyń ishinde BAÁ aýmaǵyna jasalǵan soqqylarǵa baılanysty alańdaýshylyq tanytty. Qazaqstan beıtarap memleketterdi áskerı is-qımyldarǵa tartýǵa qarsy ekeni, sondaı-aq óńir elderiniń egemendigi men aýmaqtyq tutastyǵyn buzýǵa jol berilmeıtini jetkizildi.
Ahýaldy halyqaralyq quqyq qaǵıdattary negizinde jedel túrde deeskalatsııalaý jáne daǵdarysty saıası-dıplomatııalyq jolmen retteý qajettigine nazar aýdaryldy.
Ekijaqty yntymaqtastyq máselelerin talqylaý barysynda E.Kósherbaev BAÁ-niń óńirdegi Qazaqstannyń negizgi seriktesteriniń biri ekenin jáne elderimizdi dástúrli baýyrlastyq qatynastary baılanystyratynyn atap ótti.
Qazaqstan SІM basshysy BAÁ aýmaǵynda bolǵan QR azamattaryn evakýatsııalaýǵa kórsetken járdemi úshin áriptesine alǵys bildirdi. Azamattardyń qaýipsizdigin qamtamasyz etý jáne olardy otanyna qaıtarý el úshin basym mindet bolǵanyn jetkizdi.
Syrtqy saıası vedomstvolardyń basshylary halyqaralyq arenada eki memlekettiń joǵary deńgeıdegi saıası dıalogy men ózara qoldaýyna da nazar aýdardy.
Óz kezeginde sheıh Abdalla ben Zaıd Ál Nahaıan kórsetilgen qoldaý úshin qazaqstandyq tarapqa rızashylyǵyn bildirip, óńirlik turaqtylyq pen qaýipsizdikti qamtamasyz etýge baǵyttalǵan halyqaralyq kúsh-jigerdiń mańyzdylyǵyn atap ótti.
Suhbat qorytyndysy boıynsha taraptar ekijaqty yntymaqtastyqty odan ári nyǵaıtýǵa, sondaı-aq halyqaralyq jáne óńirlik uıymdar aıasynda is-qımyldardy úılestirýdi jalǵastyrýǵa daıyn ekenin rastady.
Aıta keteıik, Lufthansa, Air France jáne ózge de eýropalyq áýe kompanııalary qaýipsizdik jaǵdaıyna baılanysty Taıaý Shyǵys baǵytyndaǵy reısterin ýaqytsha toqtatyp jatyr.
