Qazaqstan men BAÁ birlesken ınvestıtsııalyq platforma qurady
ASTANA. QazAqparat - Bıylǵy jyldyń 17 qańtarynda QR Premer-Mınıstriniń birinshi orynbasary Asqar Mamın BAÁ Vıtse-premeri men BAÁ Prezıdenti isteri jónindegi mınıstri sheıh Mansýr ben Zaıd Al Nahaıanmen kelissózder júrgizdi, dep habarlandy primeminister.kz saıtynda.
Kelissózder barysynda QR Prezıdenti Nursultan Nazarbaevtyń BAÁ-ge 15-16 qańtardaǵy resmı sapary barysynda qol jetkizilgen joǵarǵy deńgeıdegi ýaǵdalastyqtaryn júzege asyrý joldary qarastyryldy.
Taraptar energetıka, munaıhımııa, atom ónerkásibi, kólik jáne logıstıka, áskerı-tehnıkalyq salalardaǵy ortaq jobalardy damytýǵa daıyn ekenderin rastady.
«Báıterek» holdıngi men «Mubadala Development Company PJSC» Qazaqstan aýmaǵy men ózge kórshi elderdiń basym naryqtaryndaǵy ınfraqurylymdyq jáne ózge de jobalardy birlesip qarjylandyrý úshin jaqyn arada ózara ınvestıtsııalyq platforma qurýǵa kelisti.
QR men BAÁ-niń energetıka mınıstrlikteri QR-da munaıgazhımııa kesheni qurylysynyń jobasyna taraptardyń qatysý múmkindigin talqylady.
«Qazaqstan temir joly» ulttyq kompanııasy men «Etihad Rail» ulttyq temirjol kompanııasy BAÁ men úshinshi elderde birlesken ınfraqurylymdyq jobalardy júzege asyrý máselelerin talqylady.
BAÁ atom energııasy jónindegi korporatsııasy «Qazatomónerkásip» UAK»-men ıadrolyq energııany beıbit túrde paıdalaný salasynda ekijaqty qarym-qatynasty damytýǵa nıet bildirdi.
Ámirlik taraby Qazaqstan Respýblıkasy Qarýly Kúshteri áskerı oqý-jattyǵý ortalyqtarynyń ınfraqurylym nysandaryn ınvestıtsııalaý máselesin qarastyrýǵa múddelilik tanytty.
Ámirlik tarapynan kelissózderge energetıka mınıstri Sýheıl Mýhammed al-Mazrýı, Abý-Dabı Atqarýshy keńesiniń múshesi, «Mýbadala Development» kompanııasynyń Bas atqarýshy dırektory, BAÁ atom energııasy jónindegi korporatsııasynyń basqarma basshysy Haldýn Halıfa al-Mýbarak, Abý-Dabı qalasynyń meri, «Etihad Rail» ulttyq temirjol kompanııasy Dırektorlar keńesiniń tóraǵasy, ınjener Aýd Mýrshıd al-Mýrýr, qaýipsizdik pen qorǵanys máseleleri jónindegi syrtqy ister mınıstriniń orynbasary Farıs al-Mazrýı jáne QR-daǵy BAÁ elshisi Mýhammed al-Djaber qatysty.
Kezdesýge qazaqstandyq taraptan Energetıka mınıstri Q. Bozymbaev, Qorǵanys jáne aeroǵarysh ónerkásibi mınıstri B. Atamqulov, «Qazaqstan temir joly» UK» AQ basqarma tóraǵasy Q. Alpysbaev, «Báıterek» UBH» AQ basqarma tóraǵasy E. Dosaev, «Qazatomónerkásip» UAK» AQ basqarma tóraǵasy A. Jumaǵalıev jáne BAÁ-degi Qazaqstan elshisi Q. Lama Sharıf qatysty.
