Qazaqstan men BAÁ arasyndaǵy salyqtan jaltarýǵa jol bermeýge baǵyttalǵan kelisim qabyldandy

ASTANA. 12 qyrkúıek. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy Tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııany jáne oǵan Hattamany ratıfıkatsııalaý týraly» zańyn qabyldady. Parlament qabyldaǵan qujat Memleket basshysynyń qol qoıýyna joldanady.

Atalǵan konventsııaǵa 2008 jyldyń 22 jeltoqsanynda Abý-Dabıde qol qoıylǵan bolatyn. Qujattyń maqsaty eki el arasyndaǵy ınvestıtsııalar úshin qolaıly jaǵdaılar jasaý jolymen Qzaqstan men Birikken Arab Ámirlikteriniń ekonomıkalyq yntymaqtastyǵyn nyǵaıtý jáne keńeıtý bolyp tabylady. Bul rette konventsııa eki memlekettiń rezıdentteriniń tabystaryna qosarlanǵan salyq salýdy alyp tastaýdy kózdeıdi jáne salyq salýdan jaltarýdyń aldyn alady. Degenmen, qujatta tabystyń paıda bolý kózi bolyp tabylatyn memlekette dıvıdendterge, paıyzdarǵa jáne roıaltıge tómendetilgen mólsherlemeler boıynsha salyq salynýy múmkin erejeler qamtylǵan.