Qazaqstan men BAÁ arasyndaǵy reıster sany artty

ASTANA. QazAqparat – Qazaqstan men Birikken Arab Ámirlikteri arasynda qatynaıtyn reıster sany artty, dep habarlaıdy QazAqparat QR Indýstrııa jáne ınfraqurylymdyq damý mınıstrligi Azamattyq avıatsııa komıtetiniń ıýaspasóz qyzmetine silteme jasap.

«Qazaqstan men Birikken Arab Ámirlikteriniń avıatsııalyq bılikteri arasyndaǵy qol jetkizilgen ýaǵdalastyqtar sheńberinde Qazaqstan Respýblıkasy Prezıdentiniń 2023 jylǵy 15-17 qańtardaǵy BAÁ–ge saparynyń qorytyndysy boıynsha Qazaqstan Respýblıkasy men Birikken Arab Ámirlikteri arasyndaǵy reıster sany artýda»,-delingen QR IIDM baspasóz qyzmeti taratqan habarlamada.

Osylaısha, avıatasymaldardyń qoljetimdiligi jáne avıabıletter qunyn tómendetý maqsatynda 22 qańtardan bastap «Wizz Air Abu Dhabi» loýkost áýe kompanııasy Abý-Dabı jáne Almaty qalalary arasyndaǵy reıster sanyn aptasyna 3-ten 4-ke deıin (seısenbi, beısenbi, senbi jáne jeksenbi) arttyrdy. Ushýlar Airbus A320/A321 tıpti áýe kemelerinde oryndalady.

Sondaı – aq, «Fly Dubai» áýe kompanııasy 26 qańtardan bastap Dýbaı – Astana baǵyty boıynsha reıster sanyn aptasyna 10-nan 14-ke deıin jáne 28 qańtardan bastap Dýbaı-Almaty baǵyty boıynsha aptasyna 10-nan 14-ke deıin arttyrýdy josparlap otyr. Sondaı – aq, 28 aqpannan bastap «Fly Dubai» áýe kompanııasy aptasyna 2 reıs jıiligimen (sársenbi, senbi) Shymkent-Dýbaı baǵyty boıynsha reısterdi qaıta bastaýdy josparlap otyr. «Fly Dubai» áýe kompanııasynyń ushýlary B-737 úlgisindegi áýe kemelerinde oryndalady.

Reıster sanynyń artýy eki el arasyndaǵy týrıstik, iskerlik jáne saýda-ekonomıkalyq yntymaqtastyqty odan ári damytýǵa yqpal etetinin atap ótý mańyzdy.