Qazaqstan men BAÁ arasyndaǵy kelisim sol elde boı tasalap júrgen A. Meshimbaevany tezirek qaıtarýǵa septigin tıgizedi
ASTANA. 12 sáýir. QazAqparat - Qazaqstan men BAÁ arasyndaǵy kelisimniń ratıfıkatsııalanýy memleket qarjysyn jymqyrǵandyǵy boıynsha aıyptalǵan jáne sol elde boı tasalap júrgen A. Meshimbaevany qaıtarýǵa septigin tıgizedi.
Búgin QR Parlamenti Senatynyń jalpy otyrysynda «Qazaqstan Respýblıkasy men Birikken Arab Ámirlikteri arasyndaǵy Qylmyskerlerdi ustap berý týraly kelisimdi ratıfıkatsııalaý týraly» zań qabyldanǵan soń jýrnalısterge bergen suhbatynda QR Bas prokýrorynyń orynbasary Iogan Merkel osylaı málim etti.
«Biz qazirgi kúni BAÁ-ǵa qajetti qujattardy joldadyq. Sondyqtan Arab Ámirlikteri bizdiń osy kelisimdi ratıfıkatsııalaýymyzdy kútip otyr dese de bolady. Al budan keıingi másele shapshań sheshiledi: ony polıtsııa ustap, bizge habarlanady, sosyn bizdiń ókilimiz ony elge ákeledi», - dedi I. Merkel jýrnalısterge bergen suhbatynda. Onyń aıtýynsha, endigi kúni aıyptalýshy A. Meshimbaevaǵa ádilsot tóreliginen qashyp qutylý ońaıǵa soqpaıdy.
Esterińizge sala keteıik, statıstıka agenttiginiń burynǵy basshysy Anar Meshimbaeva memleket qarjysyn jymqyrdy dep aıyptalyp, oǵan qatysty qozǵalǵan qylmystyq is boıynsha keltirilgen zalal 758 mln. teńge shamasyn quraǵan bolatyn. Keıinnen statagenttiktiń burynǵy basshysyna halyqaralyq izdeý jarııalanyp, keıbir málimetter boıynsha onyń BAÁ-da júrgeni belgili bolǵan edi.
