Qazaqstan men BAÁ arasyndaǵy ekonomıkalyq yntymaqtastyqqa arnalǵan qujat maquldandy

ASTANA. QazAqparat – Májilistiń jalpy otyrysynda «Qazaqstan Respýblıkasynyń Úkimeti men Birikken Arab Ámirlikteriniń Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

«Qazaqstan Respýblıkasy men Birikken Arab Ámirlikteri arasyndaǵy yntymaqtastyq jyl saıyn kóptegen sala boıynsha keńeıip keledi. Elder arasyndaǵy taýar aınalymy 2022 jyldyń 9 aıynda 558 mln AQSh dollaryn qurasa, BAÁ-den kelgen ınvestıtsııalar aǵyny bıyldyń birinshi jartyjyldyǵynda 2021 jyldyń col kezeńimen salystyrǵanda 2 ese ósip, 128,7 mln AQSh dollaryn qurady. Jalpy, 2005 jyldan bastap 2022 jyldyń

birinshi jartyjyldyǵynda deıin BAÁ-den kelgen tikeleı sheteldik ınvestıtsııalar aǵyny 2,9 mlrd AQSh dollaryna jetti», - dedi QR Syrtqy ister mınıstriniń orynbasary Roman Vasılenko.

Onyń aıtýynsha, 2022 jyldyń 1 qańtaryndaǵy málimetterge sáıkes, Qazaqstanda Birikken Arab Ámirlikteri kapıtalynyń qamtylýy aıasynda 371 zańdy tulǵa tirkelgen. Búgingi tańda 5,3 mlrd AQSh dollary somasyn quraıtyn 28 joba iske asyrylý satysynda.

«Eki eldiń ınvestorlaryn qorǵaý jáne qoldaý kórsetý maqsatynda eki el arasyndaǵy ınvestıtsııalar ósiminiń eleýli áleýetin eskere otyryp, 2018 jylǵy 24 naýryzda Qazaqstan Respýblıkasy men Birikken Arab Ámirlikteriniń Úkimetteri arasynda Investıtsııalardy kótermeleý jáne ózara qorǵaý týraly kelisimge qol qoıyldy. Kelisim ınvestıtsııalyq ahýaldy jaqsartýǵa jáne elder arasyndaǵy ózara tıimdi saýda-ekonomıkalyq yntymaqtastyqty odan ári damytýǵa yqpal etedi. Tutastaı alǵanda, jobany qabyldaý respýblıkalyq bıýdjetten teris áleýmettik-ekonomıkalyq jáne quqyqtyq saldarǵa, sondaı-aq qarjylyq shyǵyndarǵa ákep soqpaıdy», - dedi mınıstrdiń orynbasary.